من الترع والمصارف في مصر إلى أشهر المطاعم في فرنسا وايطاليا، هذا هو سر الضفادع المصرية التي تقدر تبيعها وتكسب أرباح خيالية ولكن ما الطريقة؟ تابعنا لمعرفة التفاصيل:
المثل بيقولك االي يعيش ياما يشوف وهو ده فعلا اللي حصل في الكام سنة اللي فاتوا، لأنه واحدة واحدة انتشرت مشاريع تجارة الضفادع عشان تتصدر للخارج، ويتعمل عليها أحلى شوربة في أكبر مطاعم فرنسا.
ايوة زي ماسمعت طبق الضفادع عندهم من الأطباق الغالية والمميزة اللي بتتقدم في أحسن المطاعم، وطبعا المصريين مسبوش الفرصة دي تفلت من ايدهم، والناس بدأت تشتغل في صيد الضفادع، فياترى السوق ماشي إزاي؟
بص ياسيدي، صيد الضفادع ليه موسم زيه زي باقي الأسماك، وفي حالة الضفادع كوين الصيد بيبدأ من أبريل لغاية سبتمبر.
واللي بيحصل ان الصيادين بيطلعوا بالمراكب بليل ومعاهم عدة صيد بسيطة جدا ومن أهمها الكشاف لأنهم بيستخدموا ضوء الكشاف عشان يسلطوه على الضفادع ويحجموا حركته عشان يقدروا يصطادوها بسهولة.
بس خد بالك الضفادع اللي عليها الطلب مش اي ضفادع والسلام، لأ دي في انواع ليها مواصفات معينة، وعادة الصيادين بيدوروا على الضفدع البني والأصفر كبير الحجم.
أما بقى لو هنتكلم عن الأسعار، فسعر الكيلو في الصيف حوالي 100 جنيه فى مواسم تكاثره وفى فصل الشتاء سعره بيوصل إلى 160 جنيه، وممكن يزيد كمان بسبب قلة الكمية في الوقت.
وبعد كده يبدأ التصدير من بداية شهر أكتوبر ونوفمبر، ولو اتأخر التصدير لشهر ديسمبر أو يناير، بيتم وضعهم في مزرعة وبعدين التعاقد مع الشركات اللي بتصدر بكميات كبيرة.
وحسب جريدة اخبار اليوم، تكلفة المزرعة حوالي 25 ألف جنيه، بس المكسب كبير، والفكرة ان مزرعة الضفادع مش محتاجة تجهيزات أو صرف كتير، وخصوصا ان الضفادع ليها معدلات تكاثر عالية جدا وده هيخليك تطلع انتاج في أسرع وقت.
والمفاجأة بقي ان سعر الطبق الضفادع حاليا يتراوح من 20 يورو لـ100 يورو في أفخر مطاعم إيطاليا وفرنسا، يعني قول الطبق الواحد ب3400 جنيه.
بس خد بالك إن في نوع تاني من الضفادع فير مخصص الاستهلاك الادمي، وهو النوع المطلوب في كلية الطب والعلوم لاغراض البحث العلمي وفي إقبال على شرائه برضه.
ولو هنتكلم عن حصة مصر من السوق العالمى هتلاقي الأرقام ضعيفة شوية، مصر بتصدر حوالي 150 طن من الضفادع سنويا، وحسب الجهاز المركزب للإحصاء مصر صدرت ضفادع حية للاستهلاك الآدمي بحوالي عشره ألاف و600 دولار.
أما بقى لو هنتكلم على تجارة الضفادع عالميا،
فالمركز الأول من نصيب إندونيسيا اللى لتقدم 80% من حجم استهلاك العالم، خاصة أن سعر الكيلو الحى 40 دولاراً، وتتصدر فرنسا الدول المستهلكة بإجمالى 80 مليون ضفدعة سنويا.
ودلوقتي بقى قولنا، إيه رأيك في مشروع الضفادع وهل ممكن تشتغل فيه؟