هو نجم كبير، له كاريزما خاصة به، ولا يختلف عليها اثنين، فالكل يعترف بموهبته وأعماله الناجحة، التي تنوعت بين الكوميدي والأكشن والدراما، إنه أحمد عز، اسمه بمفرده بوستر لأي فيلم.
كفيل انه يعرفك الفيلم ده هيجيب ايرادات عالية جدا .. واللي بسبب المشوار الطويل ده مهرجان القاهرة السينمائي الدولي قرر انه يكرمه .. في الدورة الجديدة اللي هتتعمل السنة ديه .. بس مشواره مكنش سهل .. و مشاكله الشخصية عمرها ما دخلت ولا أثرت على شغله بدأ كموديل .. و بقى من أهم نجوم السينما في مصر والعالم العربي.
النجومية كلمة سهلة تتقال، بس انها تكون موجود في فنان أو فنانة، مش سهل و الأصعب انك تحافظ عليها .. فنانين كتير بيدخلوا الوسط الفني، و بيختفوا زي و بيبقى حصيلة وجودهم صفر، و فنانين تانين بيحفروا اساميهم مع كل فيلم ولا مسلسل بيقدموه، فبيعرفوا يسيبوا علامة .. و استحالة تنساهم .
ومن بين الفنانين دول احمد عز ، أو نقدر نقول عليه جوكر .. اللي السينما و المسلسلات كانوا شاغلين دماغه .. وده من قبل ما يبقى في الكارير ده أصلا .. لانه كان زيه زي شباب كتير في سنة .. دخل كلية و خلصها و بدأ شغل في مجال الفنادق .. يعني حياة مستقرة .. بينجح فيها و هيمشي على نفس الخط بقى و يكمل ..
بس انتو عارفين التمثيل ده زي الجن أما بيحضر على حد مبيسبوش. فجأة أحمد قرر يدخل الدوامة ديه و يا يكمل فيها و يجيب أخرها .. يا هيخرج كنها زي ما دخل. و بدأت بقى الافكار تيجي في دماغه .. و هوب عاوز ياخد ورش تمثيل، لا أنا عاوز أدرس .. افكار كتير كانت بتدور في دماغه، احد ما اتحط في اختيار صعب ما بين انه يكمل في حياته العادية ، و المجال بتاعه اللي قضى فيه سنين كتير ، أو يسيبه و يخش بقى في جو التمثيل و الافلام و المسلسلات و الحركات الكبيرة ديه.
اللي هيشوف اختياره هيقول ازاي يعني يسيب حاجة مضمونة و اروح ل حاجة مش مضمونة، بس عرف يعملها صح، بدأ بقى موديل أغاني، و ظهر مع أصالة في كليب أما جت عينك في عيني، بس ماشتغل كموديل تاني، لان احمد اه هو موهوب بس هو مدخلش او مبقاش في الافلام من الاول علشان موهوب قد ما هو شكله حلو، و ظهر مع ايناس الدغيدي .
وعمل أول فيلم ليه ” مذكرات مراهقة” . من أول ما نزل عمل حالة قلق كبيرة، و هجوم على الفيلم و اللي عملوه، على قد ما الفيلم اتهاجم و ناس كتير طالبوا ان محدش يشوف الفيلم، بس كان تذكرة الدخول ليه، والفيلم جاب مسلسل. و المكنة طلعت قماش.
وهوبا عمل اول بطولة ليه ” ملاكي اسكندرية”، و اللي أول ما نزل السينما حقق ايرادات كبيرة من اول ليلة عرض .. عز و ساندرا فضلوا فترة سوا يقدموا أفلام ناجحة ليهم سوا ، و واحدة واحدة اسم عز بقى من أهم أسامي فنانين الشباك في السينما، و ايرادات أفلامه بقت من ضمن قايمة اعلى نسبة ايرادات في السينما المصرية .
حظه في السينما حلو .. و في الدراما قدم كذا مسلسل مش كتير .. و اللي نجحوا منهم كان قليل بردو .. تفتكروا عز مش هيعمل مسرح .. لا طبعا عمل مسرح وقدم مسرحيتين .. علاء الدين و هادي فالنتاين .
عز من الفنانين القليلين اوي اللي حياتهم و مشاكلهم الشخصية عمرها ما أثرت عليه .. و لا أثرت على نجاحه و شغله .. بالعكس كان مع كل مشكلة و لا حوار جديد بيحصل معاه .. كان بيعمل شغل أحسن من اللي قبله .. و بينجح أكتر من قبل كده .
والسنة ديه مهرجان القاهرة السينمائي.. قرر انه يكرمه و بديله جايزة فاتن حمامة التقديرية.. وهي مو أهم جوائز المهرجان .. و فنانين كبار و مهمين اتكرموا بيها قبله .. زي يحيى الفخراني و سمير غانم و المخرج شريف عرفة ومنة شلبي و كريم عبد العزيز .. نجوم كتير ليهم تاريخ كبير و يستحقوا التكريم .