الفنان محمد رمضان اسمه بدأ يتردد في المشاكل والأزمات من جديد وبعد ما كان ركز في التمثيل وعمل مسلسل في فيلم في أغنية والحياة جميلة رجع من ثاني اسمه يتردد في القضايا والمحاكم.. وصدر قرار بالحجز على الفيلا الخاصة به منذ ساعات، فماذا حدث؟ تابعونا لمعرفة التفاصيل:
محمد رمضان كان قاعد عادي في أمان الله الصبح وهوب لقى في قرار صادر من مستشار في محكمة الجيزة بيقول إنه هيتنفذ قرار الحجز على الفيلا بتاعة محمد رمضان.. طبعًا نمبر وان مصدقش وهو أصلًا قبلها كان طالع على السوشال ميديا عادي بيستعرض كام عربية من بتوعه والحياة عادي.
طبعًا هو عارف إن في قضية والمحامي بتاعه متابع التفاصيل بس مكانش يتخيل إن حكم زي ده يطلع ضده يعني.. المهم القرار هيتنفذ ولا لأ؟ هقولكم إن حكم المحكمة بيقول إنها مختصة بالتنفيذ يعني هيحصل حجز هيحصل ومش كلام وخلاص وعشان كده نمبر وان اتحرك.
سبب الحجز
محمد رمضان عارف إن في مشكلة دايرة في القضا ولازم تتحل.. هو عنده فيلا في كومباوند في أكتوبر وفي نفس الوقت عليه فلوس ضرايب للدولة.. قال في القضية إنه هيعرض التكييفات دي للبيع ويسدد الفلوس اللي عليه.. طبعًا رمضان معملش كده ولا عرض التكييفات للبيع عشان يسددالفلوس اللي عليه للدولة ولا حاجة وودن من طين والتانية من عجين.. لأ وقفل الأبواب بتاعة الفيلا خالص وده اللي خلى القاضي ميسكتش.
الحكم بيقول إيه؟
الأول محضر التنفيذ اللي كان رايح يشوف التكييفات عشان يتحجز على الفيلا.. اتقدم بمحضر لنيابة أكتوبر وقال لازم يبقى في دعوى جنائية ضد محمد رمضان بتهمة التبديد عشان هو قفل الباب بتاع الفيلا ومحدش عارف يدخل.. راح القاضي خد قرار بكسر الفيلا والموضع ده بيدرسوه دلوقتي من الناحية الأمنية عشان يقرروا هيعملوا إيه.
وبناء على كل ده بقى محكمة الأمور المستعجلة والتنفيذ في محكمة الجيزة قررت تحجز على فيلا محمد رمضان اللي موجودة في كمباوند في 6 أكتوبر وده عشان مسددش الرسوم القضائية الصادرة ضده والمبلغ ده قيمته 9 ملايين جنيه والمفروض إن هيتحجز على 27 جهاز تكييف جوه الفيلا قوة كل واحد 2.25 حصان.
تحرك رمضان
محمد رمضان اتحرك ضد القرار ده وحلف إنه مش هيسكت وكإننا في شغل حلّق حوش والموضوع دلوقتي بقى في شوية عناد وبلّغ المحامي بتاعه إنه يعمل تظلم ضد قرار القاضي ده ويشوف بقى الموضوع هيوصل لحد فين.. بس تفتكروا العناد بتاع محمد رمضان ده هيخليه معرّض للحبس أصل في تهمة جنائية دلوقتي والموضوع عمال يوسع.