نجل راغب علامة.. شاب عشريني لا يعرف الصح من الخطأ والأغرب إن أبيه يشجعه، فدائما ما تثير تصرفاته ضجة ويتعرض لهجوم بعدها، كوضعه لطلاء الأظافر مؤخرا ولبس الخواتم النسائي، وهو ما يجعله في مرمى الانتقادات بشكل دائم.
ده بيعمل حاجات بنات كده عيني عينك قدام الناس.. يعني حركات ماشي يحط مونكير ميمنعش يلبس خواتم حريمي ميضرش المهم إنه مقضيها وعلى الله حكايته خالص.
وفي الفيديو ده هقولكم ليه لؤي ابن راغب علامة بيعمل حركات البنات دي وليه خد على إثارة الجدل كده؟ وإزاي ظهر وهو حاطط مونكير ولابس خواتم حريمي بجد اللي هتعرفوه مفاجأة لو تابعتوني للآخر.. يلا بينا.
من فترة كده وابن راغب علامة مش على بعضه يا حول الله يا رب هي الدنيا جرى فيها إيه يا جدعان مش كفاية إنه بيلبس زي الستات والناس قالوا خلاص بقى وده شغله وهو عارض أزياء والكلام ده ده حتى كمان تعب نفسياً من الكلام اللي اتقال عليه وكان عاوز أبوه يدفع فلوس للي بينتقدوه عشان يحلوا عنه لأ ده افتكر إنه بنت بقى ورايح يحط مونكير ويلبس خواتم البنات ومقضيها ع الآخر.
وصل للعالمية
اللي ميعرفش حاجة عن لؤي ابن راغب علامة فهو عارض أزياء قدر يوصل للعالمية ويحقق شهرة ونجاحات كبيرة جداً.. لدرجة إنه بقى مطلوب بالاسم من ماركات وبراندات ليها اسمها وقيمتها في السوق العالمي كمان.. ومش بس كده ده بيحط رجل على رجل ويتشرط ويؤمر ويتأمر كمان مش هما اللي عاوزينه خلاص يدفعوا.
أصلا ده مش كلامنا ده أبوه راغب علامة هو اللي قال كده لما كان بيتكلم عن ابنه وشغله واللي بيعنله وبيقول إنه فرحان بنجاحه واللي بيعمله في حياته وإنه عرف يختار لنفسه طريق وكمان السوشال ميديا بتساعده إنه يروج لنفسه ويبقى مشهور على مستوى العالم كمان.
التطور الطبيعي
طبعاً الدعم اللي قدمه راغب علامة لابنه لؤي ودفاعه عنه كان دافع قوي ليه وبالتالي حصل تطور طبيعي إن الابن يكمل في اللي بيعمله بس ياريته كمل في اللي بيعمله وبس ده زود الطين بلة زي ما بيقولوا وراح عمل حاجات بيعملوها البنات ويتصوروا بيها وبيقولوا لبعض عليها زي لما واحدة تحط مونيكر فيعجبها فتقول لصاحبتها تلبس خاتم جديد فصاحبتها تسألها عليه جابته منين بعد ما تشوف إنه شيك مثلاً.
أهو ده بالظبط اللي عمله الحيلة بسلامته وعمل فيديو على تيك توك وهو لابس خواتم حريمي وحاطط مونيكر وبيستعرض إيده وبيرقص وفرحان بنفسه والحياة جميلة ع الآخر.. لكن هو اللي عمله ده بجد ولا استظراف؟.
بصوا لؤي ابن راغب علامة مش سهل ده شاب عارف بيعمل إيه ويجيب فلوس إزاي.. طبعاً مكانش يصح إن الناس تشوفه لابس خواتم حريمي وحاطط مونيكر ويسكتوا وعشان كده الهجوم كان صعب جداً عليه والناس ادتله اللي فيه النصيب عشان بيتشبه بالستات.
لكن الحقيقة بقى إن في تريند كده منتشر اليومين دول يخلي الشاب يظهر وإيده فيها مونيكر ولابس خواتم أو أي حاجة تانية عادي.
لكن دي مش إيده الحقيقية ووقتها بيكون في بنت واقفة وراه مش بتظهر للكاميرا خالص ما عدا إيديها واللي بتكون إيد بنت عادي زي أي بنت والناس تفتكر دي إيد الشاب اللي ظاهر قدامهم في الكاميرا وده اللي عمله لؤي ابن راغب علامة بالظبط.
متعود على إثارة الجدل
وابن راغب علامة خلاص بقت حياته ماشية على مقاس الإيفيه الشهير بتاع عادل إمام في مسرحية شاهد مشافش حاجة.. متعودة دايماً ومن هنا بقى بيجيب فلوس وبيعمل إثارة جدل وأي تريند جديد يشارك فيه عشان مش كل الناس بتموت عارفاه وكمان موضوع إنه عارض أزياء واللبس الحريمي بتاعه والكلام ده يعتبر بردوا إثارة جدل بس في الآخر شغله وبيعرف يشهر نفسه ويقول أنا أهو وده مجالي وشغلي والناس هما اللي بيجروا ورايا عشان أشتغل معاهم.. يعني من الآخر منها شغل ومنها ركوب تريند.
يا ترى بقى ابن راغب علامة هيكمل في الطريق ده والناس هتستحمل بلاويه ولا هيشوف طريق تاني عشان الناس تقبله؟ اكتبولنا آرائكم في التعليقات.