كشف الإعلامي محمود سعد، أسرارًا جديدة عن حياة الزعيم عادل إمام، وذلك خلال مقطع فيديو نشره له عبر حسابه الرسمي، بموقع الفيديوهات يوتيوب.
وقال محمود سعد: اللي هقوله شفته لم يحك لي أو أسمع عنه، ولكن اللي هحكيه كله شفته لأني أنا كان حظي كويس واتعرفت على عادل إمام سنة 87 وهو متأخر عن شغلي في الصحافة بنحو تسع سنين لأن الاقتراب من عادل كان حاجة صعبة، بالرغم من أني عرفت كل النجوم ولكن ما اقتربتش من عادل إمام، وعرفته وقت ما حصل قانون 103 واعتصام الفنانين وكان موجود فاضل وشاهين وبدرخان وقالوا لي عادل إمام وقف العرض وتضامن معانا ورد لينا فلوس العرض وقال الإيراد يروح للمعتصمين فعاوزين نسجل معاه لقاء، قلت لهم أعمل إيه هو ما يعرفنيش قام محمد فاضل عمل تليفون وقال لي بكره الساعة سبعة ونص تروح مسرح السلام في إسكندرية هتلافيه مستنيك كنت صغير وداخل مكسوف ولقيت نفسي قدامه وصارت صداقة بيني وبينه مش صديقه المقرب ولكن معرفة كويسة.
وتابع محمود: عادل إمام كان مشغول جدًا فترك مسؤولية البيت لزوجته هالة الشلقاني، وأنا حضرت معاه بيوته من أول بيت لحد الآن، شفت بيته في شارع النخيل ونادي الصيد والمنصورية، وعرفت أنا قد إيه أنا أمام أسرة مش بس بيحبوا بعض، ولكن معاشرين بعض، وشفت قد إيه هو بيهتم بأخواته.. كانوا عيلة متكاملة ماشية مع بعضها، وفي مرة فرجني على غرفة رامي وبعدين غرفة سارة وبعدين غرفة محمد، ورأيت مدى الارتباط بينه وبينهم، والعيلة دي استمرت بقوة هالة الشلقاني وإخلاص عادل إمام، أسرة في منتهى الحب.. وده ظاهر في الفيديو الأخير بين رامي ومحمد فيه حب حقيقي.
واستكمل محمود سعد: كان مدي زوجته السلطة كاملة وكان كلمتها مسموعة، كان أب ناجح وبيكافح علشان يكون فيه مكانه وبيدي زوجته مكانتها وكانت كلمتها مسموعة وبتعمل كل حاجة، والولاد مرتبطين بوالدهم، وهي عيلة تشرح القلب وفي الآخر حد يقول سيبوه يخرج.
وأضاف: في ناس كتير حياتهم اتمزقت بسبب الفن والتخبط والانشغال ورأيت هذه العذابات في حياة أحمد زكي لما مرة قابلته في الأوتيل اللي قاعد فيه وكنت عاوز أعرف هل في حياته لحظة ندم وفضل يقول أي كلام ومش عاوز يقول الحقيقة، كان عاوز يمثل طول الوقت وما اعرفش يعمل حياة أسرية، ولكن عادل كان حاطط في باله يكون أسرة متماسكة حقيقية زي أسرته اللي في الحلمية أسرة متماسكة وحقيقية.. العلاقة بينهم حقيقية.
اقرأ أيضًا: فائدة 25% لمدة عام.. كيف تحصل على أعلى عائد استثمار حاليا؟