“زعلانين أن الكهرباء بتقطع 3 ساعات؟.. لولا مشروعات الكهرباء ومشروعات الدولة الأخيرة كانت هتشتغل 3 ساعات”، هذه واحدة من أهم الجمل التي قالها رئيس الوزراء الدكتور مصطفى مدبولي وهو يتحدث عن ازمه الكهرباء في مصر.
فيا ترى ليه الازمه مستمره لغاية دلوقتي؟ ومكملة معانا لغايه امتى؟ وهل فعلا الموظفين هيشتغلوا من البيت عشان يوفروا كهربا؟ طيب الحكومه ناوية تعمل ايه عشان تتصرف في انقطاع الكهرباء المستمر؟
في أول بيان عن أزمة انقطاع الكهرباء، الحكومة وعدت بانتهاء الازمة في نص الاسبوع اللي احنا فيه لكن واضح ان الوضع اتغير..
ودلوقتي رئيس الوزراء الدكتور مصطفى مدبولي طلع بتصريحات مهمة كشف فيها عن آخر التطورات فركز معايا لان اللي جاي مهم جدا
رئيس الوزرا قال ان سبب الازمه الحقيقي هو ارتفاع درجات الحراره غير المسبوقه في العالم كله، و تقدر تقول كده ان العالم في مرحله غليان، لكن احنا معندناش نقص في الغاز.
ده كمان قال كنتم زعلانين ان الكهرباء بتقطع 3 ساعات فلولا مشروعات الدوله الاخيره، كانت اشتغلت 3 ساعات، حسب موقع مصرواي.
وحسب كلامه درجات الحراره المرتفعه لسة مستمرة في اغسطس، عشان كده مدبولي أعلن عن مجموعة قرارات هتتنفذ الفترة الجاية وعد معايا ياسيدي:
1: الدوله هتشتري مازوت من الخارج بقيمة 300 مليون دولار عشان تشغل محطات الكهربا
2: تخفيف الاحمال مستمر طالما درجة الحرارة فوق 35 درجة
3: كل المباريات هتتلعب قبل المغرب توفيرا لاستهلاك الكهرباء في الاستادات
بس كل ده في كفة والقرارات اللي جايه دي في كفه تانيه خالص، لان القرار رقم 5 هو اختيار يوم الاحد من كل أسبوع طول شهر أغسطس عشان يكون يوم عمل من البيت للموظفين.
يعني ببساطه موظفين الحكومة هيشتغلوا يوم الأحد من بيوتهم طالما الشغل ده مش محتاج تعامل مباشر مع الجمهور.
اما رقم 5 بقى فهو إعداد جدول زمن بيوضح مواعيد فصل الكهرباء في كل حي والجداول دي هيتم الاعلان عنها بحد أقصى يوم الاتنين الجاي
وطبعا انت فاكر لما وزاره الكهرباء من كام يوم طلعت قالت ان الكهرباء بتقطع على رأس الساعة قبلها ب 10 دقائق أو بعدها ب 10 دقائق، وطلبت من الناس انهم ما يركبوش الاسانسيرات في الوقت ده، بس واضح كده ان الجداول الجديدة هتبقى دقيقة اكتر.
وبما ان تخفيف الاحمال مستمر معانا فتره كمان، رئيس الوزراء قال ان في لجنة هتجتمع يوميا عشان تتابع الازمة أول بأول، وفي خطة لترشيد استخدام الكهرباء والانارة في المباني الحكوميه والعامه.
كمان طالب شركات القطاع الخاص تشغل الموظفين من البيوت لو ظروف الشغل تسمح بده.
أما بقى لو بتسأل ليه الحكومة منفذتش كلامها وحلت الازمة في نص الاسبوع زي ما وعدت قبل كده، فمدبولي رد وقال إن دي كانت الخطة القديمة فعلا بس كانت مرتبطة بانتهاء الموجة الحارة خلال 4 أيام مثلا.
بس للاسف هيئة الارصاد قالت إن درجات الحرارة المرتفعة مكملة معانا في اغسطس، وعشان كده تخفيف الأحمال مستمر معانا في شهر أغسطس.
انتوا بقي ايه رايكم في تصريحات رئيس الوزرا؟ والكهربا بتقطع عندكم كام مرة في اليوم؟