كلام كثير انتشر الفترة الأخيرة إن مصر ستلغي اتفاقها مع صندوق النقد الدولي، وهذا لأن الرئيس عبد الفتاح السيسي استبعد تعويم جديد للجنيه الفترة القادمة، وهذا بالطبع يخالف شروط صندوق النقد.
بس يا ترا: هي مصر ليه استبعدت تعويم الجنيه دلوقتي؟ وكان إيه هو اتفاق صندوق النقد مع مصر؟ وازاي مصر أخلت بيه؟
خلال الأيام الأخيرة وتحديدًا بعد كلام الرئيس عبد الفتاح السيسي عن استبعاد تعويم جديد للجنيه، ناس كتير بدأت تسأل هو أحنا ممكن نلغي اتفقنا مع صندوق النقد الدولي، اللي بيشترط سعر صرف مرن للبلد؟
بص يا سيدي، صحيفة أفريكا ريبورت، سلطت الضوء في تقرير ليها عن توقف الاتفاق بين مصر وصندوق النقد الدولي بعد ما انخفضت قيمة الجنيه وتم اعتماد سعر صرف مرن وزاد المعروض من العملة الأجنبية
التقرير قال كمان، إن مصر استبعدت طلب صندوق النقد بتعويم جديد للجنيه، وده لأن البلد شايفة أنها ممكن أنها تدير دفة المساعدة المالية من غير ما تلجئ لتعويم جديد
لكن ده هيخالف شروط صندوق النقد عشان لما مصر قدمت على قرض من صندوق النقد الدولي بقيمة 3 مليار دولار يتصرف على شرايح لمدة 46 شهر، كانت واقفت وقتها على شرط الصندوق بالتزام البلاد بتطبيق سعر صرف مرن وده مطلب رئيسي ليه بصفته أنه المقرض العالمي الأكتر شهرة لصرف الأموال على كذا شريحة
دي الصحيفة قالت كمان، إن مصر ملتزمتش بتحقيق الشرط ده بشكل كامل لحد دلوقتي، وده لأن الدولة حافظت على سعر الصرف عند مستوى 30 جنيه و 90 قرش للدولار من يناير 2023، ده غير أنه انخفض في السوق الموازية وبقى بـ 37 جنيه بعد ما كان بـ 40 جنيه
وعلى فكرة صندوق النقد كان طلع بيان من فترة وقال إن البرنامج المتفق عليه مع مصر في ديسمبر الماضي، بيتضمن حزمة سياسات أولها التحول الدايم لنظام سعر صرف مرن وده عشان تعزز صلابة الدولة في مواجهة الصدمات الخارجية، وكمان عشان تنفذ سياسة نقدية هدفها تخفيض معدلات التضخم تدريجيا وده هيكون بالتوازي مع أهداف البنك المركزي المصري
أما بقى مجلة ذي إيكونومست، قالت إن مصر بتحاول زيادة احتياطي العملة الأجنبية قبل ما تاخد قرار بخفض قيمة الجنيه تاني، وده من خلال برنامج الطروحات الحكومية اللي بدأت تنفيذه من شهر مايو اللي فات، بالإضافة لإيرادات السياحة المتوقع أن هيكون فيها انتعاشة السنة دي، إلى جانب إيرادات قناة السويس اللي بنعتمد عليها بشكل كبير في العملة الأجنبية
بس ياترا هو إيه تصريح الرئيس عبد الفتاح السيسي اللي قلب الدنيا وخلى الكل يفكر إننا هنلغى اتفقنا مع صندوق النقد؟
شوف ياسيدي، الرئيس عبد الفتاح السيسي، كان صرح خلال أحد الفعاليات الشهر اللي فات إن الحكومة اتدخلت في سعر الصرف لتثبيت سعر الدولار من خلال إيداع الدولار في السوق والحفاظ على قيمة الجنيه لأنه متعلق بحياة المواطنين والأمن القومي
وقال إن لو تحرير سعر الصرف هيأثر على المصريين يبقى بلاش منه حتى لو هيتعارض مع مطالب صندوق النقد
ودلوقتي قولنا شايف إننا هنلغي اتفقنا مع صندوق النقد؟