إن كنت تمتلك وحدة سكنية أو تجارية يجب أن تركز معنا في الكلام الذي سنتناوله في هذا التقرير ، وهذا لأنك لابد أن أن تسدد الضريبة العقارية في موعد محدد وهذا لتجنب دفع غرامة تأخير.
واحنا النهاردة هنقولك على معاد تسديد القسط الأول والتاني وأخر فرصة إنك تسدد بدون غرامة، وكمان هنقولك إيه الحالات اللي معفية من دفع الضريبة العقارية:
ناس كتير بتسأل عن الضرايب العقارية وإزاي تسدد الضريبة دي من غير ما تدخل في قصص غرامات التأخير وإيه هي الوحدات اللي معفية من الضريبة.
وخلال الايام اللي فاتت، رئيس مصلحة الضرايب أنور فوزي أعلن في بيان نشره موقع القاهرة 24 إن 30 يونيو الحالي ده آخر معاد لسداد القسط الأول المستحق للضريبة العقارية واللي بتكون مقررة على مالكي الوحدات السكنية والتجارية في مأمورية الضرايب العقارية بالمنطقة التابعة الوحدة ليها.
وطبعا لو سددت الضريبة قبل المعاد ده هتضمن إنه ميتحسبش عليك أي غرامات، مش بس كده ده كمان أعلن عن معاد سداد القسط التاني هيكون في الفترة من شهر يوليو ولحد ديسمبر الجاي.
وتقدر تدفع الضريبة في منافذ التحصيل اللي موجودة بالمأموريات المختصة التابع ليها الوحدة العقارىة بتاعتك أو في منفذ مصلحة الضرائب العقارية اللي موجود في مبنى مصلحة الخزانة العامة وسك العملة.
وقال كمان نقطة مهمة جدا إنه في حالة هدم أو تخريب وحدتك السكنية وكنت من المكلفين بسداد الضريبة العقارية من حقك إنك تقدم طلب برفع الضريبة.
والمفاجأة إنه أكد إن من ضمن المزايا اللي قدمها القانون الجديد إن الوحدات السكنية المستغلة للسكن الخاصة للأسرة بشرط تقل قيمتها عن 2 مليون جنيه معفية من الضريبة.
لكن مالك الوحدة دي لازم يقدم طلب للاستفادة من الإعفاء ده ويرفق بيه صورة ضوئية من عقد الملكية أو الانتفاع أو الاستغلال وكمان يكون معاهم إيصال حديث للمرافق وصورة بطاقة الرقم القومي.
وحسب كلام رئيس مصلحة الضرائب فـ الخزانة العامة للدولة بتتحمل الضريبة العقارية عن الغير قادرين على السداد لظروف اجتماعية، لكن ده بيكون وفقا لاجراءات وضوابط معينة.
طيب هل في حالات تانيه هتكون معفاه من دفع الضريبة العقارية؟
أيوة يا سيدي حسب قانون الضريبة العقارية بينص على اعفاء المباني العقارية اللي بتستخدم كسكن رئيسي للأسر بشرط إن قيمتها الإيجارية السنوية تقل عن 24 ألف جنيه يعني أقل من 2000 جنيه في الشهر ولو زادت عن الرقم ده هتخضع للضريبة العقارية.
كمان القانون بيعفي الأراضي والمباني المملوكة للدولة ومباني الأحزاب والمقرات الدينية والجمعيات الأهلية والأراضي المنزوع ملكيتها لصالح الحكومة من دفع الضريبة العقارية.
طيب تعمل إيه في حالة لو حسيت إن الضريبة العقارية اللي محددة ليك على وحدتك السكنية مبالغ فيها أو محسوبة بشكل مش مظبوط؟
هقولك ياسيدي، حسب كلام أنور فوزي رئيس مصلحة الضرائب العقارية فـ انت من حقك إنك تتقدم للمأمورية المختصة بطلبات طعن على تقديرات القيمة الإيجارية المتخذة واللي بيتم تقديرها من خلال لجان الحصر والتقدير.
ولو انت صاحب محل دواجن فـ أحب أبشرك إن رئيس مصلحة الضرائب العقارية أكد إنه تم إدراج قطاع الدواجن ضمن القطاعات الصناعية والإنتاجية وإن هتتحمل الخزانة العاملة للدولة الضريبة العقارية نيابة عنها لمدة 3 سنين من يناير 2022 ولحد نهاية ديسمبر 2024.
وأكد إن القرار ده جه عشان يحفز الاستثمار ويساعد على تطوين الصناعة والحفاظ على دوران عجلة الانتاج المحلي
قولنا رأيك في قانون الضريبة العقارية وهل شايفه عادل؟