“أخذ 2 مليار وخلع بهم خارج مصر” هذا ما فعله واحد من المستريحين الذين نسمع عنهم كل يوم والثاني، لكن المفاجأة في هذا المستريح، أنه كان واحد من المشاهير وكثير من الناس يعرفونه.
بس قوات الأمن نجحت في الساعات الأخيرة أنها تقبض عليه، بس هو إيه حكايته؟ وأزاي اتقبض عليه؟ وإيه هو المشروع اللي من خلاله جمع 2 مليار؟
اخيرا قوات الأمن قدرت خلال الساعات الأخيرة انها تقبض على واحد من أكبر المستريحين اللي تقريبا نصب على نص مصر وجمع منهم مليارات وهرب بيهم كمان إلا أن بعد رحلة من البحث تم القبض عليه.
بس هو إيه حكاية النصاب ده؟
شوف يا سيدي، الرجال ده من المفترض أنه رجل أعمال واسمه محمود عبد الشافي، صاحب مشروع ابني بيتك بإيدك، اللي من خلاله جمع 2 مليار و500 مليون جنيه من 4 آلاف أسرة تقريبا من مختلف محافظات مصر، وبعد ما جمع المبلغ ده قفل فروع شركته، و كل اللي كانوا شغالين فيها اختفوا وأغلبهم سابوا البلد.
وطبعا العملا لما اكتشفوا اللي حصل مسكتوش، دُول اتهجموا على المشروع واتهموا صاحبه بالنصب والاستيلاء على فلوسهم بسبب أنهم مستلموش المشروعات اللي وعدهم بيها، وده حسب موقع صدى البلد.
وقالوا أنهم خسروا شقى عمرهم بسبب محمود عبد الشافي اللي وصفوه بمستريح القاهرة الجديد، عشان كده قدموا بلاغات ضده للنائب العام ومباحث الأموال العامة عشان ياخدوا مستحقاتهم.
لكن ازاي قدر ينصب على العدد ده من المواطنين؟ أنا أقولك، عبد الشافي عمل خطة ذكية جدا كان هدفها وهم العملا بالثراء السريع ودي بتركز على اللي عايزين يشتروا وحدة سكنية.
فكان بقى عبد الشافي بيقنع عدد من العملا أنهم يبنوا عمارة ويقسموا التكاليف بتاعتها بينهم وبين بعض، والشركة بقى هتتحمل مسئولية تصميم العمارة وتشطيبها وتسليمها للملاك، وطبعا الكلام ده مش حقيقي.
طيب قوات الأمن قدرت تقبض عليه ازاي؟
حسب موقع مصراوي، في معلومات سرية جت لمعاون مباحث قسم شرطة الدقي، بتقول إن النصاب ده بيتردد على واحد من العقارات في مصر وكمان ناوي أنه يعمل شركة جديدة، عشان كده رئيس المباحث الجنائية، وجه بسرعة ضبط المتهم بعد إصدار إذن النيابة.
وبالفعل تم القبض على المتهم هو وأخوه، والمتهم اعترف بكل اللي عمله بس المفاجأة بقى اللي حصلت ، أنه قال إنه ناوي يرجع كل الفلوس اللي خدها لأصحابها وأنه عايز يبدأ على نضيف، بس مدير المباحث أحاله للنيابة العامة للتحقيق
وبالمناسبة محمود عبد الشافي هربان من 200 حكم قضائي بـ 500 سنة سجن وأكتر كمان وكل الأحكام دي في قضايا نصب، عشان كده قرر أنه يهرب بره مصر لفترة لكن رجع تاني وقعد في واحد من العقارات بالدقي اللي اتقبض عليه فيه، وده حسب صدى البلد.
وبحسب تصريحات واحدة من الأهالي اللي اتنصب عليهم لموقع الدستور، إن مبادرة بيتك بإيدك كانت بالنسبة لإعلاناتها مناسبة جدا لأن كان من مميزاتها أن العميل يدفع 250 ألف جنيه وياخد حتة أرض ويبني عليها عمارة في مكان في وسط البلد وده بدل ما نشتري شقة صغيرة بالسعر ده، لكن للأسف كل ده طلع وهم.
وقالت كمان إن من ضمن الإغراءات اللي اتقدمت لينا أن أي واحد يشترك بسهم مهما كان المبلغ صغير هيقدر بعد كده ياخد مبلغ شهري من الأرباح، أما لو كان المبلغ كبير فبيكون السهم تجاري وبتاخد سكن بعد بناء العقار.
وقالت إن سبب ثقة الناس دي كلها في محمود عبد الشافي أنه كان من المشاهير وكان ليه برنامج تليفزيوني ده بالإضافة لوجود صديق ليه من المشاهير في مجال التنمية البشرية كان بيساعده في توقيع عدد من المواطنين عشان ينصب عليهم
ودلوقتي قولنا سمعت عن المشروع ده قبل كده؟