شهرين فقط ولن تجد أحد يشكو من أزمة نقص العملة وكل الأزمات التي نعاني منها من ارتفاع أسعار وأزمة في الاستيراد هتنتهي قريب جدا، نعم كل هذا سيحدث قريب جدا وهذا ليس حلم وغنما حقيقة.
وده لأن مصر هتنضم بشكل رسمي لدول البريكس في شهر يناير الجاي،
بس هو إيه علاقة ده بالدولار والاسعار؟ وازاي انضمام مصر للبريكس هيرخص الأسعار؟ وايه العملات اللي هنتعامل بيها بدل الدولار؟ واسعارها ايه قدام الجنيه؟
من الواضح كده أن أزمة الدولار خلاص قربت تنتهي ومحدش من هنا ورايح هيشتكي تاني من نقص العملة، مش عشان وفرنا الدولار لا ده عشان احنا هنستغنى عنه أو بمعني اصح مش هنعتمد عليه بشكل كامل، وده لأن مصر هتنضم لمنظمة البريكس رسميا في شهر يناير اللي جاي.
بس ياترى ايه علاقة الدولار وأزمة نقص العملة بانضمام مصر للبريكس؟
شوف يا سيدي، حسب كريم العمدة أستاذ الاقتصاد الدولي في موقع روسيا اليوم، أن الدولة مهتمة جدا بالانضمام لمجموعة البريكس، لأن هيكون في تعاون مشترك بين مصر ودول “بريكس”، واتجاه للتنوع في العملات لتخفيف الضغط عن الدولار اللي سبب أزمات كتير في اكتر من دولة وبينهم مصر.
أما الخبير الاقتصادي سيد خضر قال أن انضمام مصر للبريكس” خطوة مهمة في حركة التجارة الدولية، وخصوصا مع تشديد السياسة الاقتصادية الأمريكية ودخول العالم في نفق مظلم.
وقال كمان أن الولايات المتحدة عايزة تعدي أزمتها الاقتصادية على حساب اقتصاد الدول التانية و مصر جزء منها، وأن الدولار ليه تأثيرات سلبية على اداء الاقتصاد المصري وعلى معدل التضخم، والارتفاع المستمر في الأسعار.
وقال أن انضمام مصر للبريكس هيحقق التوازن الداخلي في المؤشرات الاقتصادية، خصوصا في فكرة الاستغناء عن الدولار وتخفيف الطلب عليه، وده اللي مصر محتاجاه خلال الفترة الجاية وهو تقليل الطلب على الدولار عشان يحصل توازن في كل المؤشرات الاقتصادية خصوصا في الاستيراد.
وعموما هو قال أن من مميزات مجموعة البريكس هو تخفيف الأعباء الدولارية واستخدام عملة جديدة زي اليوان الصيني او الروبل الروسي.
وبمناسبة الصين ده قال أن مصر عندها علاقات استراتيجية مع الصين، يعني فكرة الاستغناء عن الدولار هتكون مهمة جدا لأن الصين أهم مصدر للمواد الخام، ومصر بتستورد كل المواد الخام من الصين، وده خطوة مهمة في استمرار نجاح الاقتصاد المصري خلال الفترة الجاية.
والأهم بقى إن ده هيعمل توازن في الأسعار في كل الصناعات والسلع الاستراتيجية، وده لأن الدولار هو السبب الرئيسي في ارتفاع الأسعار.
أسعار عملات دول البريكس
لكن السؤال هنا هي أسعار عملات دول البريكس تساوى كام جنب الجنيه؟
انا اقولك، حسب المصري اليوم، فالسعودية اللي ضمن البريكس سعر الريال فيها قدام الجنيه 8.25 جنيه، أما اليوان الصيني فسجل 4.25 جنيه.
وبالنسبة للروبل الروسي فهو سجل 3 جنيه ونص، والروبية الهندية سجلت 2 جنيه و67 قرش، أما للبير الاثيوبي فسجل جنيه و76 قرش، انا الريال البرازيلي فسجل 6 جنيه و35 قرش، اما سعر الراند الجنوب أفريقي مقابل الجنيه فوصل ل1.66 جنيه، كمان الجنيه بيساوي، 11 بيزو أرجنتيني.
ووصل سعر الريال البرازيلي إلى 6.35 جنيه، لكن ده طبعا ميجيش حاجة جنب الدولار اللي وصل ل31 جنيه في البنوك ول45 جنيه في السوق السودا.
ودلوقتي قولنا شايف إن انضمام مصر للبريكس هيساهم في خفض الأسعار ولا لا؟