عمرك سمعت عن لحم النعام قبلذلك، وهل عمرك جربته؟، من الآن ستقدر تاكل لحم النعام وتشتريه من المحلات مثله مثل اللحم البقري.
بس السؤال هنا: هو لحم النعام ده بكام؟ وياترا بيتباع فين؟ وممكن يكون بديل عن اللحوم البلدي؟الفترة الأخيرة ناس كتير بدأت تشتكي من أسعار اللحوم وده لأنها ارتفعت بشكل كبير جدا ووصلت في بعض المناطق لـ 400 جنيه، عشان كده بعض التجار قرروا أنهم يبيعوا لحم النعام مع اللحوم البقري
بص يا سيدي، بحسب هيثم عبد الباسط نائب رئيس شعبة القصابين بغرفة القاهرة التجارية لموقع مصراوي، إن في اتجاه دلوقتي من بعض التجار أنهم يدخلوا لحم النعام ضمن المنتجات اللي بيبعوها جنب اللحوم البلدي، وده بقى بسبب انخفاض أسعار لحم النعام عن اللحم الكندوز
أسعار لحم النعام
بص ياسيدي، بحسب عبد الباسط سعر كيلو لحم النعام يتراوح بين 250 و 300 جنيه للكيلو حسب القطعية، أما بقى سعر كيلو اللحم الكندوز فهو دلوقتي بين 350 و 400 جنيه
لكن قال إن للأسف المشكلة في مزارع النعام إن أغلبها موجود في المناطق الساحليه وده هيصعب على التجار نقل اللحم من غير أي تلف.
أما بقى محمود عاطف، رئيس قسم النعام بمركز البحوث الزراعية قال إن في إقبال كبير جدا على شرا لحم النعام خصوصا بعد ارتفاع أسعار اللحوم البقري
وقال إن ده بسبب السعر المتقارب بينهم خاصة إن سعر لحم النعام أقل نسبيا من سعر اللحوم الحمرا ولما إتسأل كيلو لحم النعام بكام؟
رد وقال إن سعر الكيلو يتراوح بين 300 و 320 جنيه وده طبعا أقل من سعر اللحوم البقري، عشان كده المستهلكين بقوا يشتروه.
وبالنسبة بقى لسعر لحم النعام القائم قال إنه سعره 105 جنيه للكيلو، وإن النعامة اللي عمرها 11 شهر وزنها بين 90 و 100 كيلو وبتدي لحم صافي بين 40 و 50 كيلو.
ومش بس كده ده قال كمان إن في قطعيات مميزة من النعام بتستوي بسرعة زي الموزة والاستيك لكن سعرها أعلى من القطعيات التانية.
وعلى فكرة ده قال إن طعم لحم النعام مقارب لطعم اللحوم الحمرا وكمان كتير من الناس بيفضلوا طعمه أكتر من اللحوم البقري، بالإضافة إن فوايده ضعف فوايد اللحوم الحمرا.
وطمن الناس على طريقة التخلص من النعام وقال انها بتم بطريقة قانونية ونضيفة جدًا زيها زي اللحوم البلدي بالضبط وكمان بتتختم زيها.
بس يا ترا هو لحم النعام بيتباع فين؟
أنا أقولك، حسب عاطف، بيتم بيع لحم النعام عن طريق منافذ المزارع أو من خلال تجار اشتروا من المزارع، أو من خلال صفحات الإنترنت أو من الهايبر ماركت.
بس أنت لازم تعرف أن لحم النعام عمره ما هيكون بديل عن اللحوم الحمرا وده بسبب عدم توافر كميات كبيرة منه في مصر، لكن نيجي بقى للسؤال المهم هي أسعار اللحوم البلدي وصلت لكام؟
بص يا سيدي، بحسب تصريحات لمسؤؤلين في شعبة القصابين، أسعار اللحوم ارتفعت تقريبا 100% عن السنة اللي فاتت وده بسبب ارتفاع أسعار الأعلاف ونقص المعروض من المواشي
ودلوقتي سعر كيلو اللحوم في المحلات وصلت لـ 315 جنيه للكندوز و 342 للحم البتلو واللحوم الضاني
ودلوقتي قولنا بتشتري كيلو اللحمة بكام؟