“جالنا خواجات ونصحونا بنفس الحاجة اللي بيعملوها عندهم ولازم يروحوا على بيوتهم وتقولهم هاتوا الفلوس اللي خدتوها مننا.. انتوا وقعتونا في مصايب”
هذا ما قاله مستشار الرئيس في تصريح خطير وجرئ كشف فيه عن سبب جديد لأزمة انقطاع الكهربا في مصر ، والتي جعلت الناس تضرب كف على كف مما يحدث.
بس ياترى مستشار الرئيس قال الكلام ده فين وليه ؟ وليه شايف التوقيت الصيفي مصيبة وحلت على دماغنا؟ ومين الأجانب اللي عاوز يمشيهم حالا
هو النور بيقطع ليه؟ ده السؤال اللي الناس لسة بتسأله لغاية دلوقتي، رغم انه مع بدايه أزمة انقطاع الكهرباء، الحكومه طلعت وضحت السبب وقالت ان المشكله في نقص الغاز المستخدم في تشغيل محطات انتاج الكهرباء.
وهنا بقى هاني النقراشي مستشار السيسي لشؤون الطاقه طلع كشف عن سبب ما كانش على البال ولا على الخاطر، وهو التوقيت الصيفي.
ايوه زي ما سمعت، مستشار الرئيس شايف ان التوقيت الصيفي غلطة كبيره وقعتنا في مصايب بنشوف نتيجتها دلوقتي
واللي كشفه في برنامج حضرة المواطن كله مفاجآت، لأن حسب كلامه استهلاك الكهربا بيزيد بنسبة 20% خلال فصل الصيف وده بسبب استخدام التكييفات بصورة كبيرة بسبب الموجة الحارة الموجودة حاليا.
بس قال حاجة غريبة اوي، إن التوقيت الصيفي اللي تم تطبيقه في آخر شهر ابريل من أهم أسباب أزمة انقطاع الكهربا اللي بتعيشها دلوقتي، طب ازاي؟
النقراشي قال احنا جالنا خواجات ونصحونا بنفس الحاجة اللي بيعملوها عندهم، اللي هي التوقيت الصيفي، والتوقيت الصيفي بالنسبة لهم عشان يطول ضوء النهار، فيوفروا في الإضاءة، مش بيوفروا في التكييف ولا التبريد.
والفكرة ان استهلاك الكهرباء في الدول الحارة اللي زي مصر بيزيد في الصيف عشان بيزيد استخدام التكييف والمراوح، لكن في الدول الباردة بيزيد استهلاك الكهرباء في الشتاء عشان بيشغلوها للتدفئة مش للتبريد والتكييف.
وحسب كلامه التوقيت الصيفي ده نتيجة لنصيحة الاجانب، وطبعا اللي بيديك نصيحه غلط لازم تبعده عنك، يعني ما ينفعش نشغل الجماعه الاجانب دول يقولوا نصايح تجيبلنا مصايب اكتر من الفوايد
وعشان كده طالب بحاجتين، نلغي التوقيت الصيفي، والخبرا الاجانب اللي وزارة الكهرباء بتستعملهم يروحوا على بيوتهم وتقولهم هاتوا الفلوس اللي خدتوها مننا، لان انتم ما تستاهلوهاش والنصايح بتاعكم جابت لنا المصايب اللي احنا فيها دلوقتي
والفكره ان التوقيت الصيفي حسب موقع مصرواي بدأ تطبيقه في مصر من الأربعينات، لكن تم وقفه اكتر من مرة، اشهرها بعد 25 يناير 2011،
بس في 2014 رجعت الحكومه تشتغل بيه بشكل استثنائي عشان توقفوا في 2015، ومن ساعتها وتم الغاء التوقيت الصيفي لغاية ما وصلنا ل 2023 وقررت الحكومه ترجع النظام ده تاني في اواخر ابريل اللي فات.
وحسب تصريحات المتحدث الرسمي لمجلس الوزراء نادر سعد، تطبيق التوقيت الصيفي في مصر بدأ يوم 28 إبريل وهيستمر لحد آخر خميس من شهر أكتوبر وبكده تكون فترة التوقيت الصيفي هي 5 شهور، بس تفتكر ليه الحكومه رجعت التوقيت الصيفي تاني بعد إلغائه؟
الاجابه هتلاقيها في بيان الحكومه ساعة إصدار قرار اللي قالت ان ده بسبب التغيرات الاقتصاديه اللي بيمر بيها العالم كله وتطبيق توقيت الصيفي هيساعد على ترشيد استهلاك الكهرباء.
فيا ترى انتم رايكم ايه: هل التوقيت الصيفي بيقلل من استهلاك الكهرباء ولا يزودها؟ ولا أزمة انقطاع الكهرباء بعيدة اصلا عن التوقيت الصيفي، والمشكلة في الأول وفي الأخر هي نقص الوقود اللازم لتشغيل المحطات زي ما قال بيان مجلس الوزراء في الأول خالص؟