العالم علمين وشوف انت في العلمين والباقي يبقى فين؟ هي الكلمات التي قالها أحمد سعد لكي يفرح جمهوره ويرقصه معاه في الحفلة التي أقيمت وغني فيها في مهرجان العلمين والذي حقق نجاح كبير جداً جداً والناس كلها تتحدث عنه.
وطبعاً الحفل معداش كده وكان لازم يبقى فيه مواقف ولقطات حصلت عملنالكم الفيديو ده عشان تعرفوها.
يا ترى حفلة زي دي وجمهور كبير حاضر فيها ووسع وسع يعني ليه بقى أحمد سعد يغيظ طليقته سمية الخشاب في الحفلة دي؟ وإيه اللي حصل في العلمين وليه سعد اتحامى في البودي جاردات وإيه اللي عمله مع أخوه الفنان عمرو سعد.. حكايات مثيرة وتفاصيل هتتفاجئوا بيها يلا بينا عشان تعرفوها.
طبعاً أحمد سعد الفترة دي ما شاء الله يعني امسكوا الخشب وشكل نداهة الأغاني والحفلات ندهت عليه وحالفة ما تسيبه غير لما يكتب نجاح كبير جداً ولو تلاحظوا دلوقتي مبقاش في على الساحة حد الجمهور متفق عليه وعلى نجوميته وإنه بقى سوبر ستار غير أحمد سعد ولو بصينا هتلاقوا إيه اليوم الحلو ده واختياراتي والديو الأخير مع روبي وكل ده دي أغاني تريند ومعلقة مع الناس وبيعملوا عليها رقصات وعشان كده سعد بقى الطلب عليه عالي جداً ومفيش ليه منافس.. لكن كله كوم وحفلة الساحل كوم تاني.
البنات رزقها واسع
طبعاً مهرجان العلمين اللي بدأ من أيام محطوط ليه تارجت يكون المهرجان الصيفي الأهم كل سنة وجايبين فيه نجوم هيولعوا الدنيا وأول حفلة كانت مع تامر حسني ورغم النجاح اللي حققته بس أحمد سعد اللي كانت حفلته هي التانية بس ده شكله هيسحب البساط من الكل ويقول أنا نمبر وان.
الناس بيقولوا البنات رزقها واسع وأحمد سعد عنده في البيت اتنين علياء ومريم ده غير علياء الكبيرة مامتهم اللي هي أصلا وش السعد على أحمد سعد واللي من يوم ما اتجوزها وبناته وصلوا الدنيا وفي حاجة غريبة عند سعد والفنان اللي كان بتاع مشاكل مبقاش بتاع مشاكل وبقى كل تركيزه في شغله وبس لكن ده ميمنعش طبعاً إنه يضرب كرسي في الكلوب ويغيظ طليقته سمية الخشاب أو يعمل لقطة كده يشعلل بيها الأجواء وأهو كله أكل عيش.
جت الملوك
حفل أحمد سعد في العلمين حضره آلاف الجمهور وده واضح في الفيديوهات اللي منتشرة من الحفلة اللي بدأت على أنغام أغنية الملوك واللي قدر بيها يلهف القلوب من أول دقيقة.. وكمل أغانيه بـ وسع وسع والبنات قضتها رقص وحركات ودخل سعد قلوب الجمهور علطول وكمل الحفلة بقى على أغنية اختياراتي وصدقيني وإيه اليوم الحلو ده وغيرهم كتير.
الحفلة كان فيها أون فاير وصممها أحمد عصام ودي طبعاً عملت أجواء رهيبة وكأن سعد بيطلع نار من بوقه ولما الفاير مع الموسيقى وصوت سعد يطلع الناس تتفاعل أكتر ويغنوا ويرقصوا.. الحفل ده حضره لاعب الأهلي مؤمن زكريا ربنا يشفيه وكمان الفنان عصام السقا غير فنانين كتير هناك في الساحل واللي كان مفاجأة في الحفل ده أخو سعد الفنان عمرو سعد اللي بردوا كان ليه نصيبه في الحفلة دي.
بيغيظ سمية الخشاب
المفروض إن سعد رمى طوبة طليقته سمية الخشاب وملهاش مكان في حياته وكمان هو اتجوز وخلاص بقى الموضوع انتهى لكن هي مش سايباه في حاله ومن وقت للتاني كده بيكون ليها موقف معاه زي حوار القميص اللي كان لابسه في السعودية وهي علقت عليه.
بس شكل سعد منسيش اللي اتقال.. قام وهو في حفل العلمين وبيقول إنه سعيد ومبسوط بالجمهور والحفلة وإنه جاي علشان يكّسر الدنيا بس الشخص النكدي مالوش مكان معاهم في الحفلة والناس كلها فسرت كلامه إنه بيغيظ سمية الخشاب.. والله أعلم بقى يقصد كده ولا لأ.
موقف مع أخوه عمرو
طبعاً مع التفاعل الكبير من الجمهور في الحفلة وهو بيقدم الأغاني بتاعته كان بينها “بحبك يا صاحبي” ودي أهداها لأخوه عمرو سعد اللي كان حاضر الحفل.. كمان سعد قدم أغنيات زي سايرينا يا دنيا وعليكي عيون وصدقيني اللي قعد يرقص عليها وغيرهم كتير.. ومن ضمن اللقطات بردوا إن أحمد سعد اتحامي في البودي جارد في الحفل وده عشان الزحمة والناس اللي اتلمت عليه وكان طبيعي البودي جارد يتدخل عشان يعرف يسلك نفسه.
تفتكروا سمية الخشاب هتاخد الكلام على نفسها إنها الشخص النكدي اللي يقصده أحمد سعد وتطلع ترد عليه ولا لأ؟ اكتبولنا آرائكم في التعليقات.