البورصة المصرية بين يوم وليلة حالها انقلب بسبب ما حدث لواحدة من شركات القطاع الخاص التي ارتفع السهم الخاص بها بشكل غريب جدا لدرجة أن كل من البورصة أصبح في حالة دهشة ولم يصدق ما حدث، فما حكاية شركة طاقة عربية؟ تابعونا لمعرفة التفاصيل:
خلال الساعات الأخيرة الدنيا اتقلبت في البورصة وحصلت مفاجأة مكنش أي حد يتوقعها، وده لأن سهم واحد من الشركات ارتفع في أول يوم تداول ليه من نص جنيه لحد 450 جنيه في نهاية الجلسة، وبكده يوصل رأس مالها في الأخر لأكتر من 5 مليار جنيه
عشان كده البورصة قررت إلغاء عملية التداول على أسهم الشركة وده بناءًا على طلبات شركة هيرميس للسمسرة وعدد من شركات الوساطة المالية
بس إيه حكاية الشركة دي؟
شوف يا سيدي، حسب تصريحات محمد ماهر خبير الأوراق المالية لمصراوي، طاقة عربية هي واحدة من شركات مؤسسة القلعة المملوكة لرجل الأعمال الكبير أحمد هيكل
ومع اول يوم للتداول الشركة دي السهم بتاعها ارتفع امبارح بنسبة اكتر من 80 ألف%، بحسب اليوم السابع، وايوة انت سمعت الرقم صح لأن ده حصل بعد ما سعر السهم بتاعها ارتفع من 50 قرش لحد 500 جنيه
وقال كمان إن سبب الارتفاع ده على الأغلب من خلال حدوث عمليات شرا بالغلط وده أدى للضجة اللي حصلت
وعلى فكرة ده قال إن البورصة إجراءتها متزنة وقانونية، وده لأنها مش بتسمح أن حد التداول للسهم ميزيدش عن 20% من قيمته، لكن ده منطبقش على أسهم شركة طاقة عربية اللي وصل السهم فيها لأكتر من كده بكتير.
وبالمناسبة ده في أكتر من 75 صفقة تم تنفيذها بالخطأ من خلال بعض المستثمرين بقيمة 395 ألف جنيه على أسهم شركة طاقة عربية في أول يوم تداول للسهم في البورصة
لكن الموضوع ده ممررش مرور الكرام، والبورصة أعلنت عن إلغاء جميع العمليات المنفذة بالسوق الرئيسي على الورقة المالية لشركة طاقة عربية، وكمان إلغاء كل العروض والطلبات المسجلة مع تعديل سعر السهم الجلسة الجاية عشان يكون بـ 50قرش بس
وبحسب تصريحات رامي الدكاني في برنامج الحكاية، إن السهم تابع لإحدى شركات القطاع الخاص الكل اتفاجئ في نص النهار بارتفاع سعره لـ 500 جنيه تقريبا وده أثار كتير من التساؤلات وعلامات الحيرة
وقال كمان إن كان في تحركات غير مبررة للسهم وده تطلب مننا التدخل، ده إلى جانب شركات السماسرة اللي طلبت وقف التداول وإلغاء العمليات بسبب وجود شك من صغار المستثمرين بأنه هيأثر على سعر السهم بتاعهم ، وده مطلب مشروع ليهم على فكرة
وبحسب خالد أبو بكر رئيس مجلس إدارة شركة طاقة عربية لموقع العربية، إن الشركة اتجهت للإدراج في البورصة وهي معتمدة على نجاحها في كتير من المجالات زي الغاز والكهربا و الغاز والطاقة الجديدة والمتجددة، وقال إن ده بيزود فرص الاستثمار في الشركة وبيزود راس المال
وقال إن حصة مؤسسة القلعة المساهم الرئيسي في الشركة هتنخفض خلال 4 سنين وده لأن هيتم بيع جزء من حصتها لواحد من الدائنين بنسبة 20%.
وحسب بيانات الشركة، رأسمال طاقة عربية إلى 676.2 مليون جنيه، مقسم على 1.352 مليار سهم، وتمتلك مجموعة القلعة القابضة بشكل غير مباشر حوالي 55% من أسهم الشركة، وباقي الأسهم متقسمة على موالي 300 مساهم، ده كمان حددوا السعر العادل للسهم عند 8 جنيه و90 قرش حسب موقع العربية.
وخلال الساعات اللي فاتت، في شركتين أعلنوا تنفيذ صفقة كبيرة على أسهم طاقة عربية، والشركة الأولى هي شركة فاينانشيال هولدنج اللي اشترت 192.4 مليون سهم بقيمة إجمالية للصفقة بلغت 1.712 مليار جنيهو بسعر 8.9 جنيه للسهم.
والشركة التانية هي شركة ريمكو إي جي تي اللي اشترت 193.54 مليون سهم بقيمة إجمالية للصفقة 1.722 مليار جنيه وبسعر 8.9 جنيه للسهم برضه.
وحسب جريدة الفجر، شركة ريمكو إي جي تي، عبارة عن تحالف استثماري إمارتي هدفه للاستثمار في الشركات بالبورصة المصرية
ودلوقتي قولنا رأيك في اللي حصل لشركة طاقة عربية؟