تحدثت علياء بسيوني طليقة الفنان أحمد سعد عن سبب رفض أسرتها زواجها من الفنان أحمد سعد في لقاء تليفزيوني قديم.
علياء التي حلت ضيفة بعد زواجها بفترة قصيرة مع زوجها -آنذاك- أحمد سعد على برنامج 90 دقيقة تقديم الإعلامية بسمة وهبة، ردت على سؤال “إوعي تقوليلي إن مفيش حد في أسرتك اعترض على جوازك من أحمد سعد؟”.
وقاطعها سعد، مازحا: “هو مفيش حد معترضش، بما فيهم السيكيوريتي.. أنا متصالح مع الموضوع لأني بشوف الحاجات اللي بتتكتب عليا”.
وقالت علياء: “أنا قولت أجس نبض ماما، فبقولها ماما إيه رأيك أحمد ييجي يقابلك قالت لي أحمد مين؟، قولت لها أحمد سعد، قالت لي ليه؟ .. قولت لها يعني يتعرف عليكي، كده يعني.. قالت لي طنط معرفش مين جايبة لك عريس دكتور، قولت لها ماما دي مش شخصيتي وأنا مش عايزة الطريقة دي .. انسي الموضوع”.
وأضافت: “فاتصلت بأخويا، قولت له أنا عايزة أحمد وعايزاك تقابله، قال لي ماشي عشان خاطرك.. انتي يا عليا متأكدة؟ أنا بثق في رأيك .. قولت له اه طبعا.. واتفقنا على ميعاد لقيته قبل الميعاد بشوية بيتصل بيا بيقولي عليا مش هينفع، قولت له مش هينفع إيه؟ إنت هتصغرني؟.. لقيت أخويا بيقولي أنا كنت فاكر الحاجات اللي بنسمعها يعني شوية حاجات بسيطة، بس كتبت اسمه على جوجل لقيت كوارث، فمش هينفع.. قولت له اتقابلوا وبعدها اللي هتقول عليه.. اتقابلوا وبقوا أصحاب”.
واستكملت: “هقولك على حاجة، أحمد لو كان وحش كان بقى ليه رد فعل على أي حاجة في المشاكل اللي كانت بتحصل، القصة دايما بتبقى من طرف واحد، إنما الطرف بتاع أحمد ده مكنش بيرد.. طول ما المشاكل بتيجي من طرف واحد، مش معقول لازم نسمع الطرف التاني، لو هو وحش فعلا كان طلع واتكلم”.
وكشفت علياء بسيوني عن طلاقها من أحمد سعد رسميًا عبر خاصية القصص القصيرة بحسابها على موقع “انستجرام” الثلاثاء الماضي.
وروت “علياء” تفاصيل طلاقها من أحمد سعد وعن إهماله لها خلال الفترة الماضية وانشغاله بإحياء العديد من الحفلات الغنائية سواء داخل مصر أو خارجها.
وعلقت “علياء” قائلة: “الحمد لله على كل شيء، تم الطلاق بيني وبين أحمد من شوية بناء على رغبته، وحابة أقوله شكرًا على قرارك اللحظي الغير موفق في خراب بيتنا وتدمير أسرتنا الجميلة اللي أنا حقيقي تعبت فيها لوحدي تمامًا وحاولت وعديت بمواقف مفيش حد في مكاني يقبلها عشان الأسرة دي وعشان المشوار اللي أنا ابتديته ومكنتش حابة انه ينتهي”.
واستكملت: “شكرًا على توقيتك الجميل وأنا قاعدة ببنتي 3 أيام وأنت مش عارف حاجة عشان مشغول الساحل وخروجاته وبعدها شغلك، أكبر شكر على المقلب اللي أنا اخدته في العلاقة دي واللي كنت فاهمة أن ليها قيمة وبضحي وبتنازل عشانها وأنت طلعتها ولا تسوى”.
وأنهت تعليقها قائلة: “ربنا معايا أنا وبناتي في اللي جاي وينتقم منك ويديك على قد كل حاجة حصلت”