قالت الفنانة لقاء الخميسي: “بحب أسمع ابتهالات الشيخ النقشبندي، ولكن بشكل عام مش بسمع أي شيوخ بيتكلموا عن الدين لإني عندي أفكاري الخاصة”.
وأضافت خلال لقائها ببرنامج “أسرار” الذي تقدمه الإعلامية أميرة بدر بقناة “النهار”: “أنا عشت في بلد مش محتاجة حد يشرح ليا حاجة في الدين، لما كنا في الإمارات كانت التربية الإسلامية جزء من المنهج ويمتحن فيه وعدى عليا مدرسين دين قراءة وتلاوة القرآن وأمسك المصحف بالتنوين والإضغام وفي الإمارات مبيهزروش والمدرسين كان معظمهم مصريين”.
وتابعت: “مفيش ولا شيخ لفت نظري إني أسمعه، ومش مقتنعة بكل الشيوخ، وفيه ناس دلوقتي لطيفة زي الداعية مصطفى حسني جميل ومريح وهادي واعي مثقف ممكن أكون مش محجبة بس أنا بحب أسمع له لإنه مش بيقول حاجة وحشة”.
وأكملت: “العلاقة مع ربنا مش خناقة إحنا بنحب ربنا، وفيه مشايخ بيبعتوا يشتموني بسبب آرائي في الدين وعلى مدار كام سنة كنت برد في الأول من باب المناقشة وبعدين لما لقيت الناس بتشتم قفلت المناقشة”.
ولفتت لقاء الخميسي: “تجربتي في مسلسل الزوجة الرابعة مع مصطفى شعبان كانت خطيرة وأنا وقتها كنت مستغربة نفسي لإنها مش شخصيتي ومجدي الهواري كان داعم ليا ومصطفى شعبان كان معجب بيا، وانبسطت جدا بدوري”.
وعن مشهد رقصها في الزوجة الرابعة، علقت: “أنا أصلا مبعرفش أرقص شرقي، والمخرج كان عايز كده وده شغل وبعدين هل الرقص جوا رمضان حلال وبرة رمضان مش حلال، أنا اتشتمت بسبب المشهد بس عبد المنصف مزعلش من مشهد الرقص لإن ده شغلي بس زعل من الشتيمة اللي اتعرضت لها، ولكن المشهد كان لطيف والدنيا مشيت”.
مقالات أخرى قد تهمك
أعلاهم صاصا وشاكوش|ثروة خيالية لمطربي المهرجانات: عربيات فخمة وأرصدة بالملايين