بعدما وصل 4000 آلاف جنيه.. نزل اكثر من ألف جنيه مرة واحدة، وكل هذا بسبب صفقة رأس الحكمة، ولكن من اشترى بسعر 4000 و3500 جنيه للجرام ماذا يفعل، وهل الوقت الحالي مناسب للبيع أم للشراء؟
اسئلة كتيرة والناس مختارة تعمل ايه.. الأجابة في التقرير التالي:
زلزال الدهب اللي بيحصل دلوقتي خلى ملايين المصريين خايفين وحاطين أيدهم على قلبهم، وفي ناس تانية طايرة من الفرحة، والسؤال الدهب رايح على فين؟
في الاول خد بالك إن سعر الدهب في مصر بيتم تسعيره بناء على 3 حاجات: سعر الدولار في السوق الموازي، وسعر الدهب العالمي، وحجم العرض والطلب.
وفي الغالب.. انخفاض الدهب مكمل معانا كام شهر لمجموعة أسباب أولها الضربة الجامدة للسوق السودة، وعلى يدك: بعد الإعلان عن تفاصيل صفقة راس الحكمة.. الأخضر في السوق السودة بينهار، وأي انخفاض لسعر الدولار في السوق الموازية علطول هيسمع في سوق الدهب، وهو ده السبب الرئيسي في زلزال اسعار الدهب.
أما السبب التاني بقى فهو الأوضاع العالمية حواليك، وصحيح في وقت الأزمات اسعار الدهب المفروض تزيد، بس خلي بالك برضه ان العلاقة بين الفايدة في أمريكا وسعر الدهب عالميا عكسية، واغلب الناس كانت متوقعة ان أمريكا هتخفص الفايدة فسعر الدهب يطلع.
بس العكس اللي حصل، لأن أمريكا أجلت خفض الفايدة وعشان كده الدهب هيثبت على سعره كام شهر.
والمفاجأة إن نادي فرج، مستشار وزير التموين، بيأكد انخفاض اسعار الدهب لغاية 2800 جنيه للجرام عيار 21، لأنه السعر العادل لجرام الدهب.
هل الوقت مناسب لبع الذهب أم لشرائه؟
بص ياسيدي. لو انت معاك سيولة زيادة عن حاجتك استغل انخفاض الأسعار واشتري فورا، وزي مابننثح دايما علي الأولوية للسبايك بأوزان صغيرة ومتوسطة، وبرضه لو هتشتري مشغولات دهب، دور على القطع اللي مصنعيتها قليلة والاحسن تبعد عن أي حاجة فيها فصوص طالما هتشتري بهدف الادخار مش زينة وبس للمدام.
أما بقى لو انت من الناس اللي أشترت الدهب بالغالي، فالأفضل انك متبعش واصبر على الدهب اللي معاك عشان تعرف تبيعه بسعر كويس ومتخسرش فيه، إلا بقى لو كنت مزنوق ومحتاج تبيع ضروري.
ودايما في نصيحة لازم تخلي بالك منها، اشتري الدهب وانساه لأنه طريقة ادخار طويلة الاجل، يعني مش هتشتريه النهارده وتبيعه بكره ولا بعده ولا حتى قبل سنة
ولو انت اشتريت خلاص سيبه معاك لغاية ما أسعاره تزيد تاني، بس صعب دلوقتي حد يقولك الدهب هيزيد لغاية كام وامتى، وللامانة مستشار وزير التموين استبعد ان الأسعار توصل ل4000 جنيه تاني.
وياسيدي لو اتوفر معاك مبلغ الفترة دي اشتري بيه عشان تعوض فرق السعر الغالي.
وحسب شعبة الدهب.. وارد جدا استمرار الانخفاض بأسعار الدهب لغاية الأسابيع الأولى من شهر رمضان، وده بسبب عودة موسم الدراسة وكمان اختلاف أولويات المواطن اللي بيبقى مركز على شراء الأكل وتجهيزات الشهر الكريم.
وطول الفترة دي هتلاقي الطلب على الدهب قليل وسعره مستقر، بس على أواخر شهر رمضان وفترة العيد هتلاقي الطلب على الدهب بيزيد واحتمال أسعاره تزيد.
وطبعا إعلان الحكومة عن صفقة راس الحكمة قلب السوق 180 درجة، لأننا بنتكلم عن 35 مليار دولار هيدخلوا البلد على شهرين، وده هيقلل المضاربات على الدولار في السوق الموازية.
.
ودلوقتي بقى شاركنا توقعاتك وقولنا شايف الدهب رايح على فين ، وهل اللي بيحصل ده انخفاض مؤقت.. ولا صفقة راس الحكمة قالت الكلمة الأخيرة في السوق؟