“احنا عملنا اللي علينا والباقي على المستهلك” هذا ما قاله رئيس شركة الشرقية للدخان خلال الساعات الأخيرة بخصوص اسعار السجائر، ليس هذا فقط بل أنه كشف عن السبب الرئيسي للأزمة التي نعاني منها حتى الآن.
فياترى إيه سبب الأزمة؟ وهل فعلا أسعار السجاير انخفضت الفترة الاخيرة؟ وازاي المستهلك ممكن يحل الأزمة الحالية؟
لسة أزمة السجاير مبهدلة ملايين المصريين، وواضح كده أن شركات السجاير وشعبة الدخان استنفذوا كل الحلول اللي عندهم لحد ما طفح الكيل بيهم
واللي يأاكد ده تصريح رئيس شركة الشرقية للدخان خلال الساعات الأخيرة، بس ياترى هو قال إيه؟
شوف ياسيدي، حسب تصريحات هاني أمان المدير التنفيذي لشركة الشرقية للدخان في برنامج آخر النهار، لما اتسأل امتى الأسعار هترجع لطبيعتها، قال أنه صعب أننا نحدد ميعاد عودة اسعار السجاير
وقال أن المستهلك ليه دور كبير في ضبط الأسعار وده من خلال ضبط استهلاكه يعني بلاش يضغط على السوق بطلب زيادة، وبكده اأحنا عملنا اللي علينا والباقي على الناس
بس برضو هو رجع وطمن الناس وقال أن أسعار السجاير انخفضت بشكل كبير جدا خلال اليومين اللي فاتوا، وكمان بدأت تقرب من الأسعار الرسمية بسبب ضخ الشركة لكميات كبيرة من السجاير في السوق كإجراء يعني عشان تحاول تظبط الاسعار
وقال أن أزمة السجاير أزمة مفتعلة، وده لأن بعض التجار اللي كانوا بيتحكموا في السوق كان عندهم غرض معين وبيشتغلوا عليه، وبيحاولوا يشوفوا يقدروا يكسبوا قد إيه من السجاير بطريقة غير مشروعة
أما إبراهيم امبابي رئيس شعبة الدخان باتحاد الصناعات قال في برنامج اخر النهار، إن أزمة السجاير مش هتتحل قريب رغم انخفاض أسعار السجاير خلال الفترة اللي فاتت
وقال إن عشان الأزمة دي تتحل في 3 خطوات لازم نعملها وهي إصدار تشريع بتعديل الشريحة الضريبة للسجاير، لأن كل يوم بيعدي على الشركة الشرقية فيه خسارة
ده كمان حذر من نقص الخامات، وقال مفيش مورد هيرضى يديلك، لأن في تباطؤ في تحويل الدولار وفتح الاعتمادات، بس المفروض ان رئيس الوزرا مصطفى مدبولي أمر باتخاذ اللازم لزيادة توريد المواد الخام لشركة الشرقية للدخان.
أما الخطوة التانية فهي طرح السجاير في محطات بنزين «وطنية» لان الناس بتثق فيها، أما الخطوة التالتة هي أن شركة الشرقية للدخان توزع السجاير على الأكشاك ومحلات التجزئة الصغيرة، بدلا من الموزعين والتجار الكبار لأنهم اصلا راس المصيبة وهما سبب الأزمة بدليل اللي تم ضبطه مؤخرا من السجاير المتخزنة أد إنتاج الشركة الشرقية شهر كامل
وقال أننا لو عملنا ال3 خطوات دول أزمة السجاير هتتحل في 48 ساعة بس
طب خد الكبيرة بقى،، أنت عارف إن السعر الأصلي لعلبة السجاير 7 جنيه بس اه والله زي ما سمعت كده، طب ازاي؟
اقولك يا سيدي هاني أمان كان قال في تصريحات تليفزيونية ليه من ايام إن السعر الحقيقي لعلبة سجاير كليوباترا 7 جنيه بس من الشركة بدون ضرايب ورسوم تأمين صحي، وبإضافة الضرايب والرسوم سعرها الرسمي للمستهلك هيكون 24 جنيه
وقال كمان إن الرسوم دي بتشمل استيراد المواد الخام وصناعتها وأجور العاملين بالشركة وغيرها من التكاليف، وده يجي في الوقت اللي التجار بيرفعوا فيه سعر العلبة ل 4 أضعاف تمنها ودي زيادة مريبة ومش طبيعية وهدفها اكبر من أنه مجرد جشع
ودلوقتي قولنا علبة السجاير سعرها كام عندك؟ وهل الأسعار نزلت فعلا ولسة؟