اعمل حسابك منالآن لن يوجد بطاقة تموين مرة أخرى، نعم كما قرأت هذا قرار جديد من وزارة التموين والبديل هو الكارت الموحد.
فياتري ايه الحكاية؟ وليه الحكومة قررت تلغي بطاقة التموين؟ والكارت الموحد مميز عنها في ايه؟ وإزاي تطلعه؟ وإيه مصير العيش؟
جدل كبير في الساعات اللي فاتت بسبب 23 مليون بطاقة تموين بيستفيد منها 64 مليون مصري، وده بعد الاخبار اللي انتشرت عن نية الحكومة لالغائها، وده عمل حالة كبيرة من الصدمة والتساؤلات عند معظم المصريين وقلق عند البعض..
وحسب مصدر في القاهرة 24، وزارة التموين بتجهز نفسها دلوقتي لإجراءات جديدة عن طريقها هتلغي بطاقة التموين اللي بيتصرف عليها السلع التموينية والعيش المدعم، وتستبدلها بنظام جديد اسمه الكارت الموحد.
ما الفرق بين الكارت الموحد وبطاقة التموين؟!
الفرق ببساطه واللي حددته وزارة التموين والتجاره هو أن الكارت الموحد هيبقي فيه حصة السلع التموينية ونقط العيش ولكن هيتضاف عليه نظام التأمين الصحي الشامل وكمان الخدمات البريدية وكل ده هيتم اصدارة مجانا من غير اي تكلفه .
وكمان أكدت الوزارة أنه هيتم إلغاء البطاقات التموينية اول مايتم تطبيق الكارت الموحد في كل المحافظات ولكن بالتدريج، َوده ياخدنا لسؤال تاني: التموين هتطبق القرار ده في يوم وليلة؟ ولا ناوية على إيه؟
بص ياسيدي ، القرار هيتم تطبيقة من بداية شهر أغسطس في بورسعيد كخطوة أولى ، ومن بعدها هيتم تطبيقه في باقي المحافظات بالتدريج وبالتنسيق مع مكاتب البريد والهيئه العامة للاتصالات
وطبعا زمانك بتسأل: ليه اتعمل الكارت الموحد ده من الأساس وكانت مالها بطاقة التموين ؟!
ساعتها هقولك أن السبب الرئيسي لاإلغاء بطاقات التموين واستبدالها بالكارت الموحد هو عشان الكارت مايبقاش موجود مع أصحاب المخابز اللي بيستخدموا البطاقة لصرف الدعم في أغراض غير مخصصة ليه.. بالبلدي كده الناس اللي كانت بتبدل البطاقه بحاجات تانيه وتستغل اغراض الدوله لصالحها .
بمعنى اصح عشان مايحصلش نصب من بعض المخابز أو حتى الأفراد فالكارت المدعم حمايه اكتر للمستهلك .طب ايه اللي ممكن اعمله عشان اقدر احصل علي الكارت الموحد ؟!
تقدر تجيب الكارت من البريد او اي مكتب التموين بكل سهوله ومجانا زي ما أكدت الوزارة، بس في الاخر هيئة البريد هي المسؤولة عن إصداره ولتاني مرة متنساش ان إصدار الكارت مجاني ومش هتدفع فيه مليم.
وحسب عمرو مدكور، مستشار وزير التموين، تجربة الكارت الموحد تمت دراستها من فترة طويلة، وهيقدم خدمات كتيرة للمواطن ومنها خدمات التموين والتأمين الصحي الشامل، وخدمات البريد كمرحلة أولى.
وبعد كده، هيقدم خدمات صرف المعاشات، أو استخدامه في المواصلات، أو البنوك وغيرها من خدمات المدفوعات الإلكترونية.
وعلشان المواطن يحصل على “الكارت الموحد” لازم يفتح حساب شخصي فى هيئة البريد، موجود فيه البيانات الأولية للمواطن، أهمها بيانات بطاقة الرقم القومى ورقم الموبايل المسجل باسمه، والكارت مزود ببصمة ذكية بتخلي الدولة تتأكد من وصول الخدمة إلى صاحبها.
ودلوقتي بقى انت ايه رأيك في القرار اللي اخدته وزارة التموين والتجاره بخصوص الكارت الموحد؟
وهل شايف إن البطاقه كانت أفضل ولا الكارت الموحد احسن بالنسبالك عشان الخدمات اللي بقت اكتر وحمايتك من النصابين ؟! ..متنسوش تقولوا رأيكم في التعليقات.