حولوا المحنة لمنحة، استغلوا مياه الإعصار كأنها حمام سباحة في الشارع.شباب ليبيا الصغير يعطي أعظم مثل على الصبر والتحمل وانك إزاي تقدر تطلع من الأزمة منحة.
ايه اللى عمله الشباب الليبي بالظبط ؟ وايه حكايه مياه الفيضان اللى استحموا فيها في الشارع ؟ .. كل ده وأكتر هنعرفه مع بعض في الفيديو ده.
في عز الأزمة حاولوا يفرحوا وينبسطوا، شباب ليبيا وعلى الرغم من الأزمة الكبيرة اللى هما فيها إلا أنهم حاولوا بكل الطرق والسبل أنهم يفرحوا شويه ويشيلوا من الحزن والتعاسه اللى اتحطت عليهم بسبب إعصار دانيال الصعب والفيضانات الكتيره اللى تسبب فيها الاعصار.
طبعا إحنا شفنا كلنا المشاهد الصعبة والمقلقة اللى تسبب فيها إعصار دانيال، الكل تابع وشاف بعينه اللى عمله الاعصار فى ليبيا وبالأخص منطقة درنة، المنطقه تقريباً بقت صعبه جدا للمعيشة، بيوت اتساوت بالأرض والمياه بقت في كل حته تقريباً، وفي جانب تاني تماما من ليبيا في منطقة مصراته يادوب المياه كانت ماليه الشوارع، بس ما كنش فيه نفس المشاكل الكبيرة اللى حصلت فى منطقة درنة.
ومن ضيق الشباب الصغير والحالة النفسية السيئة اللى هما فيها حاولوا بكل الطرق أنهم ينبسطوا شويه ويفرحوا، استغلوا المايه اللى مالية الشوارع واعتبروها حمامات سباحه عمومية، فضل الشباب الصغير في المنطقة يسبح ويعوم في المايه كأنها حمام سباحة عمومي أو كأنهم على شاطئ البحر، كل دي مشاهد خلت الناس على السوشيال ميديا تستغرب، قالوا ازاي الشباب الليبي عمل كده ؟ وجابوا الفكره دي منين؟.
وبعد ما أغلبية الجمهور أستغرب على السوشيال ميديا، جه فى الاخر ناس وربطت الموضوع بالشعب المصري، قالك مافيش حد بيعمل الحركات دي غير الشعب المصري، المصريين كانوا بيعملوها اوقات لما المايه كانت بتبقي شديدة قوي كده في موسم الشتاء، ودلوقتي جم الليبيين وعملوا زيهم بالظبط، حولوا المنحة لمحنه، هي آه مش منحه ولا حاجه، بس أهو حاجه حاولوا يبسطوا نفسهم بيها شويه ويخرجوا نفسهم من الحزن اللى فيه.
السؤال دلوقتي: هل المياه دي هتفضل في الشوارع كده كتير ولا مصيرها إيه؟
الحقيقة إن كل المنظمات والجهات الدولية ولجان الانقاذ بتحاول على قد ماتقدر دلوقتي إنها تشيل اي بقايا من بقايا إعصار دانيال، يعني مياه الأمطار دي بيحاولوا يشيلوها وبيحاولوا يظبطوا الطرق و يعدلوها، الاكتر من كده انهم بيحاولوا يظبطوا بيوت الناس نفسها تاني من اول وجديد، يعني كل حاجه تسبب فيها إعصار دانيال في ليبيا المنظمات والهيئات الخدمية كلها بتحاول تساعد هناك إنها تشيل آثار الإعصار ده لأنه كان صعب جدا وساب وراه مشاكل كتير لليبيا والشعب الليبي الشقيق.
في النهاية تتوقعوا إن المنظمات دي تاخد وقت قد ايه على ما تقدر تشيل آثار الإعصار ده؟، وهل شيلها هيكون سهل ولا صعب ؟، ونقطه كمان؛ إيه رأيكم فى اللى عمله الشباب بمياه الأمطار واستغلالها للسباحة فيها ؟ .. في إنتظار تعليقاتكم على الفيديو.