الأميرة رجوة الحسين عروسة ولي العهد الأردني الحسين بن عبدالله لهفت قلوب الكل بجمالها والناس بدأت تتكلم عن عمليات تجميل قامت بإجرائها لكي تصل لهذه الدرجة من الجمال؟.. والمفاجأة كشفها طبيب سعودي مشهور وأيضا قال على نصيحة لازم الكل يعمل بيها.
طيب هو مفاجأة أكبر من كده وممكن تكون رجوة قلدت الملكة رانيا بخصوص موضوع العمليات ده؟ أصل الكل اتكلم عن تقارب الشبه بينها وبين ملكة الأردن.. خليكوا معايا في الفيديو ده أقولكم إيه حكاية الكلام اللي قاله الطبيب السعودي؟ وإيه حكاية التقليد دي؟.
الطبيعي في العصر اللي إحنا فيها ده إن الطبيعي ميكسبش خالص ولازم عشان تكون البنت جميلة وملامحها جذابة إنها تكون عملت عمليات تجميل.. وده بالظبط اللي اتقال على الأميرة الأردنية رجوة الحسين بن عبدالله اللي دخلت العيلة الهاشمية بقالها شهر ونص بعد فرح أسطوري على ولي العهد الأمير الحسين بن عبدالله تفتكروا هي فعلًا لجأت لعمليات التجميل رغم إنها لسه شابة صغيرة جدًا وإيه حكاية جمالها اللافت للنظر ده لدرجة إنها ملهفتش قلب الأمير لوحده دي لهفت قلب الكل وقعدت وربّعت كمان.
كل ما تكبر تحلى
خليني أقولكم إن الملكة رانيا رافعة شعار كل ما تكبر تحلى ولو لاحظتوا هتلاقوها كل ما تكبر بيزيد جمالها وأناقتها ومع مرور السنين الكل بيقول إنها معملتش أي عمليات تجميل خالص.. هي فعلًا كده بس اللي ممكن البعض ميعرفهوش إن في استثناء حصل وفي بعض التعديلات البسيطة اللي عملتها الملكة رانيا يعني لو بصينا لصورتها أيام إعدادي ومرحلة الجامعة أيام الشباب هنلاقي إن الملكة في كل الأوقات عندها ملامح جميلة ومقبولة بس التعديلات دي تمت على تحسين أنفها وشفتيها وبس ودي مش تجميل أد ما هي ذكاء منها وكانت خطوة صحيحة وموفقة مية في المية عشان قدرت تستعمل عمليات التجميل من غير أي مبالغة وفي دوره الصح.
هو الطبيعي يكسب؟
بعد زفة الأميرة رجوة على ولي العهد الأمير الحسين بن عبدالله طلع طبيب سعودي مشهور في السعودية اسمه فهد بن خالد السديري وهو استشاري الجلدية وجراحة الجلد التجميلية واتكل عن جمال أحدث أميرات الأردن رجوة الحسين وكان واخدها مثل عشان يتكلم عن دور عمليات التجميل اللي البعض ممكن يسيء استخدامها.. وكتب على حسابه في تويتر وقال إن جمال رجوة آل سيف طبيعي للغاية مع إنها ممكن تعمل أي عملية تجميل وقت ما تحب ودي حريتها بس اللي لاحظه إن رجوة ملامحها طبيعية وناعمة وعشان كده هو بيقول إن المنظر الطبيعي دايمًا أجمل.
نصيحة لابد منها
طبعًا الدكتور فهد السديري استغل جمال رجوة آل سيف الطبيعي عشان يعتبره مقياس يقدم بيه نصيحة للستات وقال إن عمليات التجميل مش عشان تغيير الملامح اللي بينتهي بالتشويه بسبب المبالغة في استخدام التقنيات التجميلية المختلفة.. وعشان كده هيفضل يقول إن أي إجراء تجميلي سواء حقن أو غيره بيكون لإبراز الجمال وتقليل مظاهر تقدم العمر وتجديد شباب البشرة مش عشان تعديل وتغيير ملامح بطريقة مبالغة تنتهي بتشويه.