“علبة السجائر وصلت لـ 70 جنيه” سوق السجائر الآن مقلوب والأسعار ترتفع ولا أحد قادر يوقف هذه الزيادات التي تحدث، لدرجة أن البعض قرر أن يبتعد عن شرب السجائر بسس أسعارها.
لكن هو إيه اللي بيحصل في سوق السجاير؟ وإيه سبب ارتفع سعرها؟ وإيه مصير الأسعار الفترة الجاية؟ وإزاي الحكومة السبب في ارتفاع سعرها؟
ناس كتير بدأت تشتكي من السجاير الفترة الأخيرة بسبب ارتفاع سعرها ونقصها كمان في السوق، لدرجة إن سعر العلبة وصل دلوقتي لـ 70 جنيه وده خلى الناس تشتريها فرط ده لو لاقوها يعني.
وبحسب جريدة الفجر، أسعار السجاير ارتفعت يوم الاربع اللي فات وسعر علبة سجاير كليوبترا وصلت دلوقتي لـ 45 جنيه، وعلبة إل ام وصلت لـ 55 جنيه، والميريت وصلت لـ 69 جنيه.
سبب ارتفاع سعر السجائر
بص يا سيدي، إبراهيم إمبابي رئيس شعبة الدخان في التحاد الصناعات، قال إن سبب الزيادة الكبيرة في أسعار السجاير في الأسواق سببه تأجيل إصدار التعديل الضريبي عليها.
هتقولي ايه التعديل الضريبي ده؟ هقولك صبرك عليا، الحكاية ومافيها حسب ابراهيم امبابي رئيس شعبة الدخان، ان الحكومة بتدرس زيادة تعريفة الضرايب على السجاير ، وده لسة تحت المناقشة.
بس الفكرة بقى إن الزيادة الضريبية دي لو اطلقت فعلا، هترفع سعر علبة السجاير من 2 لـ 3 جنيه بالكتير..
تعال بص بقى على الأسعار دلوقتي، هتلاقي من الزيادات حاليًا وصلت في السوق الموازي لـ 20 جنيه على العلبة الواحدة.
عشان كده امبابي قال في تصريحاته لبرنامج على مسئوليتي، إن الحكومة السبب في ارتفاع الأسعار ولازم تاخد قرار لحل الأزمة، وتصدر التعديل الضريبي ده بسرعة
وقال إن دلوقتي في جشع كبير من بعض التجار في بيع السجاير بالأسواق وده برضو سبب في ارتفاع أسعارها، عشان كده طلب من المواطنين أنهم يبلغوا عن أي تاجر بيبيع بسعر أعلى وده بعد ما يتأكدوا من سعر العلبة الحقيقي من خلال الباركود الموجود عليها عشان أي تاجر جشع ياخد العقاب اللي يستحقه، وبكده أزمة السجاير الموجودة في السوق هتتحل وكل تاجر هيخاف
أما بقى محمد عطية الفيومي، أمين صندوق الاتحاد العام للغرف التجارية، طلع وطمن المواطنين وقال في تصريحاته لبرنامج صالة التحرير، أنه من المتوقع انخفاض أسعار السجاير الفترة الجاية، وده بسبب إن الناس بطلت تشرب السجاير بسبب ارتفاع سعرها
ده كمان من فترة انتشرت أنباء عن رفع شركة الشرقية للدخان لأسعار السجاير بداية من شهر يوليو، بس الشركة مسكتتش وطلعت بيان ونفت كل الكلام اللي اتقال وقالت أن الكلام اللي انتشر ده مش حقيقي ومش صحيح
وقالت إن أسعار السجاير متغيرتش من شهر مارس اللي فات وأن الهدف من الكلام اللي انتشر هو تحقيق مكاسب على حساب المستهلكين، وقالت إن لازم المستهلك يتأكد من السعر الحقيقي للعبة من خلال الباركود اللي عليها
أسعار السجائر
شوف يا سيدي، حسب جريدة الفجر، فالسعر الرسمي والمعلن لعلبة سجاير كيلوبترا كينج سايزهو 23 جنيه، أما بالنسبة لباقي أنواع كيلوبترا فهي بـ 24 جنيه بس، وبالنسبة لسجاير بوسطن فهي وصلت دلوقتي لـ 24 جنيه، أما بقى سعر سجاير مونديال وماتوسيان فهي بقت دلوقتي بـ 24 جنيه.
ودلوقتي قولنا بتشتري علبة السجاير بكام؟