أنت عارف لو أنت موظف في أي شركة وتعمل عن بعد، ممكن تأخذ تأشيرة لأكثر من دولة أوروبية لكي تعمل وتعيش فيها إن كنت تريد، ولكن ما هي التفاصيل والروط؟ تابعونا من أجل معرفة كافة التفاصيل:
مين فينا مش بيحلم أنه يسافر ويعيش بره مصر لكن للأسف ده بيتطلب فلوس وإجراءات كتيرة جدًا وصعبة، لكن خلاص أنت دلوقت ممكن تحقق حلمك وتسافر كندا بكل سهولة، أيوة أنت دلوقتي ممكن تسافر كندا، لكن إزاي؟
بص يا سيدي، حسب موقع العربية، كندا دلوقتي بتعتزم طرح تأشيرة دخول جديدة تمنح للي معاهم التأشيرة دي الهجرة والانتقال والعيش بشكل كامل فيها، الفكرة دي جت لكندا من سنة 2020 وقت الإغلاق العالمي اللي اتسبب في تغيرات جذرية وكبيرة على مستوى العالم واللي كان ضمنها تغييرات في أسواق العمل المختلفة
لكن إيه تفاصيل التأشيرة دي؟
حسب جريدة مترو البريطانية، السلطات الكندية ناوية إنها تطرح تأشيرة خاصة للأشخاص المتنقلين، اللي شغالين في وظيفة ثابتة لكن عن بعد، ودي الطريقة اللي انتشرت في أسواق العمل خلال السنين الأخيرة
وعلى فكرة التأشيرة دي بتيح لحاملها العيش في كندا لكن بشرط أنه يكون عنده وظيفة ثابتة في شركة أجنبية مقرها خارج كندا، وكمان الوظيفة دي لازم تكون بتأديها عن بعد
لكن لحد اللحظة دي مفيش أي إعلان رسمي عن تفاصيل المخطط الكندي، زي مثلا المهن المؤهلة للحصول على التأشيرة
وبالمناسبة مش كندا بس اللي هتمنح التأشيرة دي، لأ دي في دول تانية بتفكر دلوقتي تمنح تأشيرة للعمل عن بعد
وده بحسب موقع العين الإخبارية، اللي قال إن إسبانيا بتدرس إطلاق تأشيرة رقمية تسمح من خلالها العاملين عن بعد القدوم لإسبانيا للإقامة والعمل لمدة سنة
المبادرة دي كمان بتمنح فيزا رقمية للي بيعتمدوا على 80% من مصدر دخلهم من العمل مع شركات خارج إسبانيا
وخلي بالك الفيزا دي مش هتكون مقيدة بمكان محدد للإقامة في إسبانيا، لأ دي هتكون شاملة أبرز المدن الإسبانية زي مدريد وبرشلونة وفالينسيا وبيلباو وابيزا وجزر الكناري
ده كمان قانون الفيزا الجديد هيسمح للأجانب العاملين من الخارج في شركات مش إسبانية، بالإقامة في إسبانيا أثناء ممارستهم عملهم لفترة 6 شهور لسنة، مع إمكانية تجديد الفيزا دي مرتين بحد أقصى، من غير ما تلجئ لإستخراج تأشيرة عمل تقليدية
ومش بس إسبانيا وكنده اللي هيمنحوا التأشيرة، لأ دي كمان إيطاليا بتمنح تأشيرة ” nomadi digitali” ودي بقى مخصصة للأشخاص اللي بينفذوا أنشطة معينة من خلال الأدوات التكنولوجية بالعمل عن بعد أو بشكل مستقل أو حتى لصالح شركة خارج إيطاليا
لكن هو إيه الهدف من التأشيرات دي؟
حسب موقع العربية، الهدف من إطلاق النوع ده من التأشيرات هو تشجيع العمال عن بعد الانتقال لكندا أو لأي دولة بتمنح التأشيرة دي، عشان يجربوا يعيشوا هناك ولو عجبهم الوضع يعيشوا هناك على طول، وده جزء من محاولة البلاد دي لاستهداف العاملين في مجال التكنولوجيا
ودلوقتي قولنا رأيك في النوع ده من التأشيرات؟