3 أشياء تحدث الآن لها علاقة بأسعار الذهب من داخل وخارج مصر، وهي:طرح الشهادات الدولارية الجديدة، وأيضا قرارات الفيدرالي الأمريكي بخصوص سعر الفائدة، وأخيرا الخناقة التي حدثت بين أوكرانيا وروسيا.
وهنا بقى ييجي السؤال المهم؟ إيه تأثير كل ده على الدهب؟ وهل فعلا طرح الشهادات الدولارية هينزل سعر الدهب الأرض؟ ولا اللي بيفكر يشتري يصبر شوية ولا يشتري علطول لأن السوق هيكون ليه رأي تاني ؟
ناس كتيرة أوي مهتمة بأسعار الدهب في مصر وعايزين يعرفوا هيحصل إيه للدهب الفترة الجاية خاصة وإن سعر جرام الدهب كان وصل ل3000 جنيه.
لكن بفضل مبادرة إعفاء الدهب من الجمارك، حصل استقرار الفترة الأخيرة في أسعار الدهب عشان يسجل الجرام 21 مابين 2150 و 2200 جنيه.
لكن من كام يوم بس البنك الأهلي وبنك مصر أعلنوا طرح شهادات دولارية بعائد يوصل لـ7% و 9% لمدة 3 سنين، وده عشان تزود حصيلة البنوك من الدولار، خاصة وإن البنوك أعلنت إنها مش هتطالب المواطنين بالكشف عن مصادر الفلوس لو اشتروا الشهادات دي.
طيب يا ترى إيه تأثير كل ده على أسعار الدهب؟
هقولك يا سيدي الحقيقة إنه مصير الدهب حيرنا وده لأن في ناس شايفه إنه هيزيد الفترة الجاية وناس شايفه العكس تماما
عندك المدير التنفيذي لمنصة آى صاغة، سعيد امبابي، توقع تراجع أسعار الدهب الفترة الجاية حوالي ما بين 200 لـ 300 جنيه مرة واحدة
وقال كمان إن السبب الرئيسي للتراجع ده هو طرح الشهادات الدولارية واللي هتساعد في ضبط سعر الدولار بالسوق الموازي، وبالتالي هيكون ليها تأثير مباشر على تراجع أسعار الدهب في الأسواق المحلية بشكل ملحوظ.
طيب إزاي الكلام ده ؟ حسب كلامه، هبوط أسعار الدهب بيكون نتيجة تراجع أسعار الدولار في السوق الموازي، لأن ده السعر المستخدم في تحديد سعر الدهب.
طب ليه أسعار الدهب عندنا مش مرتبطة بسعر الأوقية العالمية؟
حسب كلام المدير التنفيذي لمنصة آى صاغة فـ عشان يكون في توافق بين سعر الذهب بالأسواق المحلية و سعر الأوقية بالبورصة العالمية، لازم يحصل توافق ما بين سعر الدولار في البنوك مع سعر الدولار في الأسواق الموازية، وطبعا ده اللي الحكومة بتحاول تعمله .
أما الدكتور ناجي فرج مستشار وزير التموين لشئون صناعة الدهب فـ قال في تصريحات صحفية إنه لولا مبادرة زيرو جمارك اللي عملتها الحكومة كان هيتخطى سعر الدهب حاجز الـ 3500 جنيه.
وعلى عكس كلام رئيس آى صاغة توقع “فرج” إن أسعار الدهب هتزيد تاني الأيام الجاية، وقال إن في توقعات إنه يشهد سوق الدهب العالمي ارتفاعات قوية وطبعا ده هينعكس على السوق المحلي.
أما خبير المشغولات الذهبية أمير رزق في تصريحات خاصة لـ «المصري اليوم»، توقع ارتفاع سعر الدهب الفترة الجاية وقال إنها هتتخطى حاجز الـ 2200 جنيهاً ، وإن الفترة الحالية هي أفضل أوقات شراء الدهب في مصر
انتوا بقى قولولنا مع أنهي رأي في دول وشايفين مستقبل سوق الدهب ازاي؟