الساعات الأخيرة الدكتور مصطفى مدبولي رئيس مجلس الوزرا أصدر قرار جديد بخصوص تعديل معايير معاش تكافل وكرامة، مش بس كده ده كمان حدد الفئات المستحقة للمعاش
فياترى إيه تفاصيل القرار ده؟ وإيه شروط الحصول على المعاش؟ وقيمته دلوقتي وصلت لكام؟ ومين هي الفئات المستحقة للمعاش؟
الحكومة دايما من وقت للتاني بتصدر قرارات بخصوص المواطنين وده عشان توفر ليهم حياة كريمة ومستوى معيشة محترمة، زي مثلا المعاشات الاستثنائية اللي أقرتها ومعاش تكافل وكرامة وغيرها.
وكانت أخر القرارت دي هو قرار رئيس مجلس الوزرا بخصوص تعديل معايير معاش تكافل وكرامة، بس إيه هي التعديلات الجديدة؟
شوف يا سيدي، حسب موقع صدى البلد، القرار الجديد نص على إن يكون الاستحقاق الأسري لبرنامج تكافل وكرامة للأسرة المعيشية المستحقة أو أبن المطلقة أو الأرملة هو 406.25 جنيه شهريا، أما للمسن اللي عمره 65 سنة أو أكتر أو المعاق غير القادر على الحركة فهيكون 562.50 جنيه.
مش بس كده، ده قال كمان إن المبلغ المستحق للطفل تحت سن الـ 6 سنين هو 75 جنيه، أما التلميذ في المرحلة الإبتدائية فهو 100 جنيه، أما التلميذ اللي في المرحلة الإعدادية فهيكون 125 جنيه، والثانوية 175 جنيه، أما الطالب في التعليم الجامعي فالمبلغ المستحق ليه هو 200 جنيه.
أما بالنسبة ليتيم الأبوين وكريمي النسب أو الللي في مرحلة تعليمية ملوش عائل فالمعاش المستحق ليهم هو 437.50 جنيه، ونفس القيمة دي بتاخدها المطلقة والأرملة أو المهجورة أو المنفصلة أو زوجة نزيل مراكز الإصلاح والتأهيل بدون أبناء.
مش بس كده ده قرار رئيس الوزرا أتاح الجمع بين الدعم النقدي لبرنامج تكافل وكرامة يعني ممكن تاخد أكتر من معاش في تكافل وكرامة، وممكن أكتر من شخص في أسرة واحدة ياخد المعاش عادي.
وبالنسبة للمادة التانية من القرار فهي استهدفت الأسر اللي بتعاني من الفقر الشديد ومحتاجة دعم عيني ونقدي بس بشرط أن يكون عندها أطفال سنهم بحد أقصى 18 سنة.
وحسب تصريحات الدكتور على الإدريسي الخبير الاقتصادي، لموقع صدى البلد إن في ظل الظروف اللي احنا فيها الحكومة بتصرف مبالغ كبيرة على برامج الحماية الإجتماعية وده عشان تساند المواطن لمواجهة الظروف الاقتصادية اللي أثرت على المستوى المعيشي للمواطن.
وقال كمان إن الهدف الرئيسي من كل ده هو توفير حياة كريمة للمواطنين، وإن الدولة دلوقتي بتتحرك في ملفات كتير بخصوص محدودي الدخل والطبقة المتوسطة من خلال الإهتمام بمعاشاتهم واستقرار الأسعار في الأسواق قدر الإمكان وبرامج تكافل وكرامة وحياة كريمة.
وقال كمان إن الحكومة بتابع القرارات دي بناءا على توجيهات الرئيس عبد الفتاح السيسي يوميا،
شروط الدعم النقدي من تكافل وكرامة
أنا أقولك، حسب صدى البلد، أول حاجة إن الحالة الاقتصادية للمستحق تكون ضعيفة، أو الابن المهجور الي ملوش هائل بس لسة في التعليم وبحد أقصى 26 سنة.
وكمان لازم الأسرة تتابع باستمرار برامج الصحة الأولية للأطفال من أول ما يتولدوا لحد 6سنين من مراحل نموهم وجدول التطعيمات وغيرها.
وكمان يكون الأبناء في الفئة العمرية من 6 إلى 18 سنة مسجلين بالمدارس بنسبة حضور متقلش عن 80٪ من عدد أيام الدراسة.
ودلوقتي قولنا رأيك في قرار مجلس الوزرا؟