هو صحيح الحكومة مش قادرة تحل أزمة الكهرباء؟ ، وليه المواطن مضطر يتحمل قطع الكهرباء لمدة شهرين؟ وإيه المجهود اللي عملته الحكومة في مواجهة أزمة الكهرباء؟
أسئلة كتيرة سألها الإعلامي عمرو أديب في برنامج الحكاية، وهذا بكي يعرف كواليس أزمة انقطاع الكهرباء وتخفيف الأحمال في مصر.
الإعلامي عمرو أديب انتقد تصريحات الدكتور مصطفى مدبولي اللي اتكلم فيها عن أزمة الكهرباء في مؤتمر صحفي عقده يوم الخميس اللي فات.
وقال إن الإجراءات اللي أخدتها الحكومة الفترة اللي فاتت عشان تواجه أزمة انقطاع الكهرباء في مصر مش مرضية للمواطن وإن آلية العمل العام لازم يكون فيها شجاعة المواجه وسأل أديب وقال: هو فين مواجهة الأزمة ؟
الناس عندها إحساس بتخبط الحكومة وعدم التنسيق بين الوزارات.مش بس كده ده كمان أديب سأل وقال: هو إيه المجهود اللي عملته الحكومة في مواجهة أزمة الكهرباء؟، وهل المواطن مطالب بأنه يتحمل انقطاع الكهرباء لمدة شهرين سنويًا في ظل الارتفاع الكبير في درجات الحرارة؟
وقال إن خطاب الحكومة للمواطن غلط.. ومخاطبة الناس بـ الشكل ده مكنش موفق وإن الشعب المصري ناضج مش طفل، والمواطن المصري حكيم وبيفهم ولما تيجي الحكومة تكلمه لازم توضح له الحقايق، وإن اللي الحكومة عملته مخباش الأزمة.. والنور لما بيتقطع مش هيكون سر”.
وفي كلامه طالب الإعلامي عمرو أديب بـ إن الحكومة تعدل لغة خطاب المواطن عن أزمة الكهرباء أو ارتفاع الأسعار
وقال بالنص: أرجو من الحكومة تعديل الخطاب.. الأزمة مش عيب.. البلد دي عاشت مشاكل الدنيا والأخرة، لكن قولي وفهمني عشان أكون معاك، هل رئيس الوزراء مكنش يعرف الفرق بين حل الأزمة في يومين أو استمرارها لمدة شهرين؟.
وكمل وقال: المواطن في أمس الاحتياج للكهرباء مع ارتفاع درجات الحرارة وليس مع انخفاضها، مصر مش دولة في الإسكيمو، الصورة المنقولة للمواطن مش كويسه والكلام اللي اتقال ميدخلش العقل، إحنا شعب صبور ويتحمل ولكن بشرط مصارحته بالحقائق.
وقال «أديب»، إن رئيس الوزراء أعلن انتهاء الأزمة مع منتصف الأسبوع اللي فات لكن ده محصلش!
وإن رئيس الوزراء خرج في المؤتمر الصحفي الأخير عشان يعلن عن استمرار الأزمة في شهر أغسطس الجاي وأنها ممكن تمتد لحد سبتمبر.
وقال بالنص «إحنا اتقالنا أغرب كلمة، قالك لغاية 35 درجة، فوق كده هيبقى في مشكلة، هي أي محطة في الدنيا فوق الـ35 بيسحبوا الكهرباء؟
إنت ليه بتقولي فوق الـ35 مقدرش؟ لأن المقنن اللي محطوط لك ميكفيش يعدي ده، قولي كده، اللي عندي ده ما يكفنيش!
وحسب تصريحات الدكتور مصطفى مدبولي فـ فعلا الحكومة ادت نفسها الوقت ده على اعتبار يعني إن موجة ارتفاعات الحرارة الشديدة دي هتنتهي لكن اللي حصل إنها منتهتش وواضح إنها مكملة معانا شوية ده غير كمان إن الارصاد أعلنت إن أغسطس الجاي هيشهد درجات حرارة مرتفعة مشوفنهاش قبل كده
وطبعا بناء على الكلام ده، الحكومة قررت تستمر في آلية تخفيف الأحمال وده لأنه حسب تصريحات رئيس الوزراء المشكلة مش مرتبطة بس بتوفير كميات الوقود عشان تشغل المحطات الكهربائية
لكن المشكلة إن التوربينات اللي بيستخدموها عشان تشغل المحطات الكهربائية بتحتاج تستهلك وقود أكبر لما درجة الحرارة بتزيد عند درحة معينة وده عشان تشتغل بنفس معدل الكفاءه، وعشان كده الحكومة هتستمر في آلية تخفيف الأحمال
قولنا رأيك في جهود الحكومة لحل أزمة الكهرباء؟