لو عندك بيت أو شقة فيهم أي مخالفات وتحتاج تعمل تصالح وتريد أن تعرف ما هي الإجراءات المطلوبة، فإن هذا التقرير من أجلك وهذا لأننا سنوضح الخطواتوالشروط المطلوبة من أجل التصالح على مخالفات البناء.
الحكومة أعلنت من فترة عن حزمة تعديلات جديدة في قانون البناء وده عشان تسهل وتبسط الإجراءات على المواطنين اللي حلمهم يعملوا تصالح ويمشوا قانوني.
وده لأن قانون التصالح فى مخالفات البناء بيستهدف مواجهة مخالفات البناء وتنظيمها وإعادة وتطوير كل المرافق والخدمات، وإعادة هيكلة الخريطة العمرانية.
لكن في شروط جديدة حطها القانون للتصالح في مخالفات البناء، منها مثلا ضرورة تقديم طلب التصالح وفقا للحي أو الجهاز التابعة ليه الوحدة المخالفة.
كمان لازم يلتزم المواطن الراغب فى التصالح بسداد قيمة رسم الفحص واللي بتختلف من مكان لآخر، مش بس كدة ده كمان ضروري انه يلتزم الشخص بسداد مقابل التصالح فى حال قبول طلبه.
ولازم المواطن اللي مقدم طلب التصالح فى مخالفات البناء يدفع قيمة التصالح، واللي بتبدأ بـ50 جنيها للمتر ولحد 2500 جنيه للمتر، وطبعا الرقم اللي هتدفعه بتحدده لجنة التصالح.
طيب افرض انت مش معاك المبلغ المطلوب للتصالح، تعمل إيه؟
متقلقش يا سيدي وده لان الحكومة عندها إمكانية تقسيط قيمة التصالح على مدار 3 سنين بشرط انك تدفع مقدم 25% من القيمة الإجمالية والمفاجاة هي انك بعد ما بتدفع قيمة التصالح بتاخد قرار نهائي بتسوية المخالفات.
طيب ياترى هل ممكن رسوم البناء تزيد الفترة الجاية؟
بحسب تصريحات مصدر مسئول في وزارة التنمية المحلية لموقع الشروق إن رغم تعويم الجنيه أكتر من مرة وخفض قيمته خلال الشهور الأخيرة إلا أن قيمة التصالح هتكون زي ماهي في القانون الجديد.
وقال كمان إن أسعار قيمة التصالح في القانون القديم كانت بـ 50 جنيه حد أدنى للمتر في القرى و 2500 للمتر كحد أقصى في المدن وإن الأسعار دي هيتم تطبيقها في القانون الجديد من غير أي تغيير.
و فـ تصريحات للنائب النائب هشام الجاهل، عضو لجنة الإسكان بمجلس النواب كشف إن قانون التصالح في مخالفات البناء الجديد بعد تعديله هيتم الأخذ بالتصوير الجوي اللي تم في 30 سبتمبر 2022.وطبعا الإجراء ده هيضيف كتير من المباني لقانون التصالح في مخالفات البناء.
ولو بتسأل عن معاد تطبيق القانون فأكد إن التطبيق الفعلي لقانون التصالح في مخالفات البناء هيكون بعد الانتهاء من التعديلات الجديدة الخاصة بقانون التصالح في مخالفات البناء وإن القانون هيرجع مرة تانيه لمجلس النواب لإقراره؛ وبعد كده يبدأ التطبيق الفعلي للقانون.
وإنه كان بيتمنى إنه يتم الانتهاء منه خلال دور الانعقاد الحالي، اللي فاضل على انتهائه أسابيع معدودة.
دلوقتي قولنا وبكل صراحة رأيك في التعديلات الجديدة الخاصة بقانون التصالح على مخالفات البناء؟